1.2 MILYON KA TONELADA HIN MAGNETITE SAND KADA TUIG AN KUKUHAON HA KAHILAB-AN HAN SAN PEDRO BAY HIN USA LA NGA MINING COMPANY

TACLOBAN CITY – Waray ha diskusyon an mahihimo nga maraot nga epekto ha katawhan labi na ha kaurugan nga mga bungto nga nakahilira han San Pedro Bay tikang ha Tacloban ngadto ha Abuyog, Leyte an mga ginpapahayag han tagapagyakan han mga kompanya han mina sugad nala han Northern Access Mining Inc. (NAMI) nga target nga magkuha hin 1.2 milyon ka tonelada hin magnetite sand sunod nga tuig.

“An aton kalibungan kun maruba mahagos hin dekada ngadto ha usa kagatos ka tuig antes mabalanse an nawara hini kumpara han pira la ka tuig nga pagruba hini, kun sugad mapira paman ka milyon an kantidad hini kun bilyon-bilyon naman nga mawawara hini kumo epekto ha katawhan kutob pa ha sumurunod nga henerasyon” pahayag ni Nestor Lebico, Secretary General han SAGUPA-SB.

Damo an nag-iinteres nga mga kompanya hin mina ha bug-os nga rehiyon labi na ha Leyte nga dapit han San Pedro nga riko hini nga magnetite sand ug black sand nga batakan nga material para han paghimo han puthaw.

Usa pa nga dako nga kompanya hin mina an Pan Asia Mining Limited nga nagkaada hin katungod magmina hin maabot 41,093.85 ka ektarya hin offshore (ha dagat) tikang ha mga baybay ngan dagat han Basey, Marabut, Samar, Tacloban, Tanauan, Tolosa, Dulag, Mayorga, MacArthur ngan Abuyog, Leyte.

“Ini nga mga dagko nga kompanya hin pagmimina in pareho hin linta nga nagsusopsop han aton karikuhan kun di man pareho hin buwaya ngan pating nga karuyag maghadi ngan kaunon an bug-os nga gintatagamtaman han kadam-an” kadugangan pa ni Lebico.

Mahinunumduman nga ini nga mga dagko nga langyaw nga nagmimina ha aton lugar in prinsipal nga nag-iexport han magnetite sand ha nasud China kumo numero uno nga nagproproduser hin puthaw ha bug-os nga kalibutan.

DAKO NGA AYAT HAN TIARABOT NGA BAG-O NGA PRESIDENTE AN PAGPATUMAN HAN TINUOD NGA REPORMA HA AGRARYO

TACLOBAN CITY – Ha pinakabag-o pala nga ginpagawas nga desisyon han Korte Suprema han nakalabay nga Mayo 20, 2010, gindesisyunan hin pinal nga kinahanglan ig-distrebwer na an mga katunaan nga sakop han plantasyon han asukar ha mga parag-uma kaupod na an kontrobersyal nga Hacienda Luisita nga pananag-iya han pamilya Cojuangco-Aquino.

Dako nga ayat han nakikita nga ti-arabot nga presidente han Pilipinas nga hi Noynoy Aquino tungod kay ha maiha nga panahon in nagtagamtam ug naniyupi han kusog ngan pananag-iya han mga kablas nga parag-uma ha Hacienda Luisita an iya pamilya.

“Kinahanglan diri la tuna nga sakop han katubohan an igdestrebwer han gobyerno kundi adton mga hagluag pa nga katunaan nga pananag-iya han dagko nga agaron maytuna ug korporasyon labi na han langyaw nga ginproprotektahan han balaud nga CARP ngan yana CARPer” pahayag ni  Nestor Lebico, Secretary General han SAGUPA-SB.

Ha rehiyon-8 ginpaparayaw han DAR-8 nga mayda hira ig-papanhatag nga katunaan nga naabot hin 94,496 ka ektarya ha diri pa la maiha nga naaprobahan nga CARPer Law.

Bisan paman ha statistika han gobyerno ha aton rehiyon nga damo na kuno an nahatagan hin tuna, nagpapabilin la gihap an haluagan nga kawaray tuna ngan nagpapabilin nga pito (7) ha napulo (10) nga parag-uma an waray pananag-iya hin tuna, usa nala nga dako nga ehemplo ha aton rehiyon an pangagaw hin tuna ni Justice Cheng Veloso ha Leyte Saba Basin Area ha Leyte.

Pagmalatumat pa ni Lebico nga an kawaray pananag-iya hin tuna ngan tinuod nga suporta serbisyo an prinsipal nga rason kay ano ginugutom ngan nagkukure an katawhan Pilipino labi an mga kablas nga parag-uma nga higot han kontrol han mga agaron maytuna ngan lubong ha utang tungod han diri patas nga bahinay han produkto ha uma, paghinitaas han presyo han batakan nga papliton ngan pagbarata han presyo han mga produkto ha uma nira.

“Kinahanglan himuon han bag-o nga pamunoan han gobyerno an libre nga panhatag han tuna ha mga parag-uma nga waray katuman han nauna nga Aquino nga rehimen ngan kun sugad kinahanglan igbasura na an CARPer Law ngan balyuan han Genuine Agrarian Reform Law (GARL) nga ginpaplastar dida han GARB” siring pa ni Lebico.

“An bag-o pala nga iligal nga pag-aresto han napulo (10) nga mga paag-uma ha Hacienda Yulo ha Laguna dida han Mayo 22, 2010 ngan an pirit nga pagpa-iwas han mga parag-uma ha 7,100 ka ektarya hin tuna han Hacienda nga ginpaplano nga igkumbert ngadto ha subdivision ngan golf course imbes nga ipanhatag ha mga parag-uma in kadugangan nga ayat han bag-o nga malingkod nga presidente nga igbasura na an CARPer Law” dugang pa ni Lebico.

Mahinunumdoman nga tikang sakopon an nasud Pilipinas han Kastila ngan Amerikano ngan ha mga sumunod nga mga presidente kutob yana han Arroyo nga rehimen in waray nahimo nga Tinuod nga Reporma ha Agraryo ha katawhan Pilipino.

BAG-O NGA TEKNOLOHIYA PARA HAN ELEKSYON DAMO AN LUHO NGAN BULNERABILIDAD

TACLOBAN CITY – Basar han bag-o pala nga ginpagawas han COMELEC han nakalabay nga Abril 30, 2010 nga report han SysTest Labs Inc. kumo natudlok han ahensya nga magre-review han source code han program nga ginagamit han mga PCOS nga makina in mayda nakita nga 9,888 nga problema tikang ha kritikal, mayor ngan minor nga mga problema han ginhimo nga program han computer.

“Asya na ini an maiha na namon nga ginsesering nga dako an posibilidad han automated gihapon nga panlisbot ha tiarabot nga automated election 2010, mismo an pagpagawas han report napulo (10) kaadlaw antes mag-election in klarado na nga pagbaliwaray han pahimatngon han mga eksperto ngan dako hini an baratunon han rehimen US-Arroyo ngan COMELEC ha katawhan” pahayag ni Frank Falguera, Secretary General han ANAKPAWIS-EV.

An SysTest in usa nga US Company nga nagpagawas han resulta han mga problema han program nga ginagamit han PCOS nga makina tikang ha Corruption han Database, posible nga injection hin SQL (Structured Query Language) database command ngan mismo diri naka-encrypt nga database ngan password nga mga problema.

Dida pa han February 9, 2010 ginpagawas an report han SysTest pero gindelatar ini han COMELEC pag-anunsyo ha katawhan ngan bisan gin-ayad na an iba nga mga problema han Smartmatic nagpapabilin la gihapon nga mayda 5,466 nga mga problema an waray kaayad sakob han 9,888 nga mga problema.

“An pinakabag-o pala nga pagpalpak han configuration han Compact Flash Card nga gagamiton ha PCOS in panigamnan na nga ginbaliwaray han COMELEC an sagdon han mga eksperto ngan nakikita gud nga bulnerable ha panlisbot an nasabi nga PCOS nga makina kun diri man tuyuon nga diri madayon an tiaarabot nga election 2010” dugang pa ni Falguera.

Mahinunumduman nga hadi nga mga nakalabay nga bulan in damo nga mga grupo an nagdedemanda han pagreview ha publiko han source code han program han makina nga PCOS nga gagamiton han pinaka-una nga nation-wide automated election ha aton nasud pero waray ini tuguti han COMELEC.

DIRI BAG-O AN URHI NGA PAGKONEKTAR HAN ANAKPAWIS PARTYLIST HA MGA NPA

TACLOBAN CITY – Maiha na nga mahugaw ngan malisyuso nga taktika han mga militar an hayagan nga pagkonektar han mga progresibo nga partylist ha New People’s Army (NPA) ha panahon han eleksyon.

Diri ini bag-o ha katawhan Pilipino an nasabi nga report han militar ha radyo ngan pahayagan nga nakuhaan an mga NPA hin mga campaign materials han ANAKPAWIS ngan BAYAN MUNA, tungod mismo kada panahon han eleksyon in nagbabalay-balay pa ngani an mga sundalo para mangampanya kontra han mga progresibo nga partylist.

“Ngatanan nga pamaagi in ginhihimo han militar para dauton ngan igpahimutang an huna-huna han katawhan ha rehiyon nga an mga progresibo nga grupo ngan indibidwal in waray pag-iiba ha NPA ngan sugad himuon target na liwat han ira mga ekstrahudisyal nga panmatay” pahayag ni Frank Falguera, Secretary General han ANAKPAWIS-EV.

Samwak kaupay nga maiha na nga ginhaharas han mga militar kutob ha pagpatay han mga kaapi ngan lider han mga progresibo nga grupo ha aton rehiyon, ngani aada na ha 118 an biktima han ekstrahudisyal nga panmatay ha panahon han rehimen US-Arroyo ngan damo pa nga panalapas han tawhanon nga katungod.

Kaupod hini nga paghulga an milyunes nga kantidad han grabe nga pagdistroso han pagkaon han mga kablas nga mga parag-uma sugad nala han nahitabo nga panunog han militar han kahumayan ha Basey, Samar.

Di pa la naiha, ginagamit han militar an ira helikopter para ipanhulog ha mga baryo ha Northern Samar an mga barasahon nga nananawagan nga diri butosan an mga progresibo nga partylist.

“Buwa an ginpapasamwak han militar nga an ANAKPAWIS PARTYLIST in kasumpay han NPA, imbes nga suportahan han gobyerno ngan militar an maiha na nga hingyap han mga parag-uma nga magaka-ada tinuod nga reporma ha agraryo, ginbubutang-butangan pa lugod ini hin mga hinimuan nga sala” dugang pa ni Falguera.

Sumala pa kan Falguera, nagpapakita daw ini nga ira desperado nga kampanya kontra ha mga progresibo nga kandidato nga nahahadlok an presente nga rehimen nga magdaug an mga progresibo tungod han mga ginduduso nira nga mga tinuod nga reporma nga makakabenepisyo han katawhan ngan nasupak ha interes han mga aada ha poder sugad han Genuine Agrarian Reform Bill (GARB).

“Angay lugod hatagan hin pinalidad ngan disipplina an mga militar yana nga panahon han election tungod han ira ginbubuhat nga pagkampanya nga igindidiri ha batakan balaud han COMELEC, ngan taliwas ini han pahayag han militar nga hira in non-partysan nga intidad” pagtatapos ni Falguera.