DAGMIT NGA PAGAWSON HA PRESOHAN AN FOUNDING SECRETARY GENERAL HAN SAGUPA-SB NGA HI DARIO TOMADA!

TACLOBAN CITY – Kinahanglan pagawson ha pinakamadale nga panahon ha presohan an founding Secretary General han Samahan han Gudti nga Parag-uma ha Sinirangan Bisayas (SAGUPA-SB) nga hi Dario Tomada nga gin dakop han ISAFP ha Binan, Laguna han July 22, 2010 banda 11:00 han gab-i. Gin-aalegar nga hi Dario Tomada in kabulig han nahitabo nga panmatay ha Inopakan, Leyte hadton tuig 1985 ngan yana ginpreso ha Camp Karingal, Quezon City ha kinse (15) ka-ihap hin murder nga kaso.

“Biktima hi Mano Dario han OBL ni Gloria Macapagal Arroyo nga kun diri ka man patayon in paghihimuan ka hin sala nga waray mo buhata labi na han panahon ni Gen. Palparan han 2005” pahayag ni Nestor Lebico, Secretary General han SAGUPA-SB.

Pagmalatumat pa ni Lebico nga dako an papel ni Mano Dario han pagkatindog han panrehiyunal nga organisasyon han parag-uma ha rehiyon-8 nga amo an SAGUPA-SB. Nagserbi ini komo Secretary General han SAGUPA-SB han 1989 kutob 2001 ngan nahimo nga Chairman han 2001 kutob nga lumakat hiya ha Manila han tuig 2005. An iya paglakat tungod han sunod-sunod nga panmatay han mga aktibista ha rehiyon-8 ngan mismo biktima hiya han frustrated murder han pusilon hiya ha ira lugar.

“Nananawagan kami labi na kan Pres. Aquino nga pagawson hi Mano Dario tungod buwa ngan hinimo-himo an kaso nga ginakusar ha iya han nakalabay nga rehimen ngan an iya yana kapreso in tungod han pakig-away para han tinuod nga reporma ha tuna ngan kauswagan han mga parag-uma ha aton rehiyon” kadugangan pa ni Lebico.

Mahanunumdoman nga kilala nga lider parag-uma han rehiyon-8 hi Dario Tomada ngan nanindugan ha pagkontra han mga polisiya ngan programa nga kontra parag-uma antes napiritan nga kumadto ha Manila para likyan an hulga ha iya kinabuhi han tuig 2005.

Advertisements

LIBRE NGA PAGHATAG HAN TUNA HA MGA PARAG-UMA WARAY MATALAKAY NI P-NOY HA IYA SONA

TACLOBAN CITY – Waray tagi duon ni Pres. Noynoy Aquino an libre nga paghatag han tuna ha mga parag-uma nga hasta ngada yana aada ha mga kamot han dagko nga mga agaron maytuna sugad nala han mga Cojuangco. Amo ini an nakikita nga mayor nga problema han mga parag-uma diri la ha rehiyon kundi ha bug-os nga Pilipinas. Nagpapadayon nga pito (7) sakob han napulo (10) nga parag-uma ha bug-os nga nasud in waray pananag-iya han tuna.

Samtang kapot han mga agaron maytuna an haluag nga katunaan magpapadayon an maiha na nga pagkontrol ha mga parag-uma ha ekonomiya han mga agaron maytuna ha kaumhan. An kawarayan tuna an mayor nga rason kay anu lubong ha utang an mga parag-uma, lugi ha bahinay ngan padayon nga kapobrehan.

“Kun nagpatapod man hi P-Noy hin mga suporta serbisyo ha mga parag-uma in kaparte la ha dapat niya iginsaad komo responsabilidad han gobyerno nga angay ihatag, ngan dako nga kulang ini ha tinuod nga pag-uswag ha aton agrikultura” pahayag ni Nestor Lebico, Secretary General han Samahan han Gudti nga Parag-uma ha Sinirangan Bisayas (SAGUPA-SB).

Pagmalatumat pa ni Lebico nga diri poyde ibulag an dako nga parte ha bug-os nga hitsura han tinuod nga reporma ha agraryo an paghatag hin libre han tuna para ha waray tuna, nasunod nala kunta an mga suporta serbisyo para han mas mauswag nga kabuhi han mga parag-uma.

“Kinahanglan mabaroan han bag-o nga rehimen nga diri la korapsyon an problema han katawhan nga ginhihimo han mga burukrata-kapitalista nga aada ha poder han aton gobyerno kundi an mas grabe pa nga pyudal nga paniniyupi han mga agaron maytuna ha kaumhan labi ini nga monopolyo ha tuna ngan an kontrol han kapitalista ha aton ekonomiya nga nagpupugong han pag-uswag han aton agrikultura ngan tinuod nga industriyalisasyon” pahayag pa ni Lebico.

Mahanunumdoman nga kakulop nga adlaw ginpahayag ni Pres. Aquino an iya syahan nga SONA komo ika-15 nga presidente han Pilipinas para ipahayag an problema ngan solusyon han iya aministrasyon nga ginhinulat han katawhan labi an sektor han parag-uma ha aton rehiyon.