PANALAPAS HAN TAWHANON NGA KATUNGOD HAN 8TH INFANTRY DIVISION GINTATAHUBAN PINAAGI HAN OPLAN BAYANIHAN!

TACLOBAN CITY – Gintatahuban han 8th Infantry Division han pagpangulo ni Major General Gerardo Layug an haluagan nga panalapas han tawhanon nga katungod ha Sinirangan Bisayas pinaagi han programa kontra-insurhensya hini nga Oplan Bayanihan.

“Waray awod nga ginyakan ni Major General Layug nga waray kuno panalapas han tawhanon nga katungod tungod kay waray man daw ginpapasaka nga kaso kontra han mga military. Dako ini nga buwa tungod kay mismo an mga biktima nga mga parag-uma nagyayakan han mga binuhatan han military sugad han panunog han ira propyedad, humay ngan tubtob ha pagpasuol ha ira,” pahayag pa ni Nestor Lebico, Secretary-General han Samahan han Gudti nga Parag-uma ha Sinirangan Bisayas o SAGUPA-SB.

Han naglabay nga semana, sunud-sunod nga nagyakan ha radyo an mga nagin biktima han panalapas han tawhanon nga katungod han military nga natarehas han bag-o pala yana nga pahayag han Commanding Officer han 8th ID nga hi Major General Layug. Iginhambog hini nga nagsusunod an hugpo han kasundaluhan han mga balaudnon kasumpay han pagprotehir han tawhanon nga katungod. Ngan iginkanit hini an pagigin epektibo han implementasyon han Oplan Bayanihan ha bug-os nga rehiyon.

“Nagpapaka buta-bungol hi Layug han tinuod nga nahitatabo ha sektor han parag-uma yana nga panahon. Ginlalasorbo hin grabe nga mga operasyon-militar an mga kabaryuhan han isla han Samar ngan Northern Samar. Bisan ha Leyte, samwak an pan-aabuso ha mga kababayen-an nga military an may binuhatan,” dugang nga pahayag ni Lebico.

“Apisar han ginhihimo nga kabangis han mga military ha amon ranggo, diri ini magigin rason para kami pamingawon ngan bul-iwan an amon iginpapakigbisog para ha tinuod nga reporma ha tuna. Padayon nga makikigbisog an sektor han mga parag-uma para pakyason an maraot nga larang han Oplan Bayanihan ngan han US-Aquino II nga rehimen,” pagtatapos ni Lebico.###

 

 

 

Advertisements

PAG-ISTRAPING HAN BALAY HA USA NGA LIDER PARAG-UMA HA TACLOBAN CITY, GINKOKONDENA!

Tacloban City – Hugot nga ginkokondena han sektor han parag-uma ha Sinirangan Bisayas an ginhimo nga pag-istraping han balay han usa nga lider parag-uma kakulop Setyembre 18, 2012 ha Brgy. 97 Cabalawan, Tacloban City.

Banda alas-dose trayna han kaagahon kakulop, ginpauranan hin bala an palibot han balay ni Marlon Demelino – dati nga Chairman han NAPSE o Nagkakaurosa nga Parag-uma ha Suhe para ha Ekonomiya han suspek nga hi Boy Gaytos mayda dara nga shotgun ngan usa nga nagngangaran nga Kabang Gaytos nga mayda naman dara-dara nga sundang. Ini nga magbugto nga suspek, ugsa kumadto ha balay ni Marlon Demelino, tag-usa-usa nga ginpanarhog an mga kaapi han NAPSE.

Nag-ayat hin agway hi Kabang Gaytos kan Marlon Demelino ngan nagyakan nga “Gawas Nonoy patayon ko ikaw. Mabaya ka gud ha imo multicab ngan asawa. Matig-a gud an imo ulo. Ginpaiwas na kamo ni Dr. Enriquez. Diri ka abtan hit Disyembre, patayon ka namon”.

“Ini nga ginbuhat han mga suspek nga hira Kabang ngan Boy Gaytos, nagpapamatuod la ini han kahakog ngan kamadarahog han agaron maytuna nga hi Camilo Enriquez Jr. nga bubuhaton niya an ngatanan nga pamaagi para la mapaiwas an mga parag-uma ha Brgy. Suhe bisan pa magsuhol hiya hin mga tawuhan nga mga ex-convict,” pahayag ni Nestor Lebico, Secretary-General han Samahan han Gudti nga Parag-uma ha Sinirangan Bisayas o SAGUPA-SB.

“An sektor han parag-uma ha bug-os nga rehiyon 8, nananawagan han hintutungdan nga ahensya han gobyerno nga mahatagan hin hustisya an ginhimo nga pag-istraping han balay han amon igkasi parag-uma nga hi Marlon Demelino. Dagmit nga madakop an mga natudlok nga suspek para di na makapanhibang utro ngan mapatukan hin kaangayan nga sentensya. Ha mga pulis naman han Diit Sub-Station, diri la magpakabuta-bungol han tinuod nga nahitatabo ha mga parag-uma ha Suhe. Pumapel han trabahuon nga ginhatag komo protektor han katawhan diri protektor han agaron maytuna,” pagtatapos ni Lebico.###

Image

Image

Image

Image

BADYET PARA HA SERBISYO-SOSYAL, MAPANLIMBONG ILAROM HAN PUBLIC-PRIVATE PARTNERSHIP NI P-NOY!

Tacloban City – Ha gin-aprubahan pala nga Budget 2013 ni Presidente Noynoy Aquino, ginhahambog hini an paghitaas kuno han badyet ha mga batakan nga serbisyo-sosyal. An kamatuoran, dako an gin-gahin nga badyet ilarom han programa nga Public-Private Partnership nga kon diin pribado nga mga kompaniya an mag-iimplementar hini nga mga proyekto.

“Ngatanan nga pamaagi bubuhaton han rehimen Aquino II para mapalipay an amo nga imperyalista nga Estados Unidos. Ultimo mumo nga badyet para ha panlawas, pabalay ngan edukasyon kukurakuton ngan kakawaton hini nga nagpopostura nga PPP o 3Ps,” pahayag ni Nestor Lebico, Secretary-General han Samahan han Gudti nga Parag-uma ha Sinirangan Bisayas.

Ilarom han Public-Private Partnership nga programa, nag-alutaga hin 26 bilyon para pagtindog ngan pagrepair hin mga classroom, 14 bilyon naman pagrepair hin mga hospital, 3.2 bilyon para imprastraktura han mga State Universities ngan Colleges ngan pabalay 21 bilyon. An nasabi nga mga proyekto maghahagudalan han pagsapribado han batakan nga serbisyo han gobyerno ngan komersyalisasyon han edukasyon ha Pilipinas.

“Kinahanglan kon anuman an pondo nga gin-gahin para ha mga batakan nga serbisyo-sosyal ma-implementar hin maupay para pagpulsan han katawhan. Diri mag-interbiner an mga pribado nga mga kompaniya kay panigurado ganansya la an lanat nira hini nga mga pondo,” pagtatapos ni Lebico.###

 

OPLAN BAYANIHAN: BAYANIHAN HAN MGA MILITARY PAGPAKURI HA MGA PARAG-UMA!

TACLOBAN CITY – Diri tinuod nga Bayanihan ha esensya an ginpapakita han programa han rehimen Aquino II nga Oplan Bayanihan kundi bayanihan ha ranggo han mga military para pakurian an katawhan labi na an mga kablas nga parag-uma nga amo pirme an nahilalapiki han ira implementasyon hini ha kabaryuhan.

“Inutil, madarahog ngan kontra-parag-uma an tinuod nga ladawan han programa ni PNoy kontra-insurhensiya. Nagpo-postura kuntaloy nga para ha kamurayawan ngan kauswagan pero hini nga bulan pala klarado na kon ano an tinuod nga ginbubuhat han mga military ha kabaryuhan,” pahayag ni Nestor Lebico, Secretary-General han Samahan han Gudti nga Parag-uma ha Sinirangan Bisayas o SAGUPA-SB.

Baryo-baryo an nagrereklamo yana ha kahanginan han ginbubuhat nga pan-abuso han mga military. Una nga nagpahayag dida han Setyembre 2 an mga parag-uma tikang ha San Jose de Buan, Samar nga kon diin ginpansunog an ira mga balay ngan gindistroso an kahumayan. Paghagos hin usa ka semana, mga parag-uma liwat ha Motiong Samar an nagrereklamo nga ginpauranan hira hin bala han mga military bisan pa man naggiginuliat hira nga mga parag-uma la. Waray pa kakuntento, pati mayda kulang ha pag-iisip ginkastigo pa han mga sundalo.

Ha Leyte, usa nga organisasyon han mga parag-uma ha Burauen, Leyte ginbungkag han mga sundalo nga nagpo-proseso la ngani hin Virgin Coconut Oil ngan nagpapa-praktis hin sustainable agriculture. Nanarhog ha mga myembro nga kon magmeting pa hira, bobombahan daw an mga parag-uma. Ginpakaraot liwat han mg military an usa nga organisador han MASIPAG nga kuno komander han NPA. Waray pa makontento, an mga military liwat yana ha Carigara, Leyte ha pangunguna ni Sarhento Rivera han 19th Infantry Battalion in nagbabalay-balay ha Brgy. Camanse para panguha hin litrato ngan titulo hin tuna ha mga parag-uma.

Samtang ha kasyudaran naman sige liwat an pa-pogi points han mga kasundaluhan pinaagi hin pagkokondukta hin medical missions, pagbulig ha imprastraktura ngan pagsurbeylans han mga progresibo nga mga organisasyon ngan mga lider-organisador. Asya ba ini an Oplan Bayanihan?

“Diri magpalipat an katawhan ha Sinirangan Bisayas hini nga ginpapakita nga kamaupay kuno han mga military. Angay nga magbantay an kada tagsa ngan igbuksas an harap-harapan nga pagbayolar han katungod pantawo labi na ha sektor han parag-uma. Duruyog naton nga pirdehon an Oplan Bayanihan,” pagtatapos ni Lebico.###

 

Image

Image

Image

 

AFTERSHOCK GIN-AABAT YANA HAN MGA PAMILYA NGA BIKTIMA HAN PANUNOG HAN 87TH IB!

TACLOBAN CITY – Ginkukundina han mga parag-uma ha Sinirangan Bisayas an panunog han tulo (3) nga balay ngan panhibang han mga tanom han mga elemento nga nagtitikang ha 87th Infantry Battalion ha Sitio San Pablo, Brgy. 3, San Jose de Buan, Western Samar dida han nakalabay nga Agusto 22, 2012 banda alas noybe han aga.

“Mas grabe pa ini ha natural nga kalamidad sugad nala han umigo nga 7.6 nga linog ha aton lugar, porlo menos may nasasalin ha linog pero ini nga panunog han mga sundaluhan han 87th IB waray nasalbar nga mga importante nga gamit ha makaluluoy na ngani nga kabutangan han aton mga kablas nga parag-uma,” pahayag ni Netor Lebico, Secretary General han Samahan han Gudti nga Parag-uma ha Sinirangan Bisayas o SAGUPA-SB.

Pagmalatumat pa ni Lebico nga kalakip nga nasunog an mga importante nga gamit nira Violeta Labong, 57 an pangidaron, usa han tag-iya han tulo nga ginsunog nga balay nga kon diin nahiupod kasunog an mga live birth ngan mga gamit ha pag-eskwela han iya mga anak. Bisan an aranihon nga humay waray pakundangan nga gintamak-tamakan han mga military.

“Grabe yana an gindurot nga kakurian ngan kagutom han mga apektado nga pamilya han aftershock pagsunuga han ira pakabuhian ngan urukyanan. Angay nga papagbatunon an mga kasundaluhan han 87th IB han ira ginhibang nga mga tanom ngan propyedad. Nananawagan liwat an mga parag-uma ha Commission on Human Rights nga imbestigaran ini yana nga nahitatabo nga haluagan na panalapas han katungod pantawo ha sektor han mga parag-uma” kadugangan pa ni Lebico.

Manunumduman nga haluagan nga militarisasyon an ginhihimo yana nga panahon han mga military ilarom han ira programa nga Oplan Bayanihan. Diri la ha San Jose De Buan ini nahitatabo kundi pati ha bug-os nga rehiyon 8 sugad nala ha bungto han Burauen,Leyte, pati an pira nga mga bungto ha Northern Samar. Mas magdudurot ini hin kadislokar ha pangukoy ngan pakabuhian ha ranggo han mga kablas nga parag-uma.###