TINUOD NGA REPORMA HA TUNA, HUSTISYA NGAN KAHIMYANGAN AN MAYOR NGA TUMONG HAN REBOLUSYON HA EDSA

TACLOBAN CITY – Waray pa makab-ot an tinuod nga tumong han EDSA nga Rebolusyon tikang himuon han katawhan Pilipino an haluagan nga protesta kontra han diktador nga Marcos, pagpagawas han kurap nga Estrada ngan ha pagkayana han bag-o nga rehimen ni Aquino nga nagdara han popularidad han people power revolution tikang han iya mga kag-anak.

 

Nagpapadayon hasta ngada yana nga panahon an demanda han katawhan Pilipino nga magkamay-ada kalugaringon tuna, hustisya labi na han mga biktima han rehimen ni Arroyo ngan kahimyangan labi na ha nangungukoy ha kaumhan nga ginhahapak han grabe nga militarisasyon ha luyo han bag-o pala nga hampak han kalamidad nga gin-aabaga pa hasta ngada yana han katawhan.

 

“Mas angay unahon han rehimen Aquino an pagpapatuman han tinuod nga reporma ha tuna nga diri niya mahimo mismo ha iya haluag nga katunaan ha Hacienda Luisita kun gusto han presidente an tinuod nga pagselibrar han espirito han EDSA 1 nga rebolusyon,” pahayag ni Nestor Lebico, Secretary General han Samahan han Gudti nga Parag-uma ha Sinirangan Bisayas o SAGUPA-SB.

 

Pagmalatumat pa ni Lebico nga an tinuod nga espirito han duha na nga EDSA nga rebolusyon in tinuod nga pagbabag-o ha aton katilingban nga diri nahihimo han aton mga nagkakapot han aton gobyerno, lugod nagpapadayon an mga kalugaringon nga interes han aada ha poder para uwaton ngan huthutan pa an masa nga nagbabalhas.

 

“Napamatud-an ha kasaysayan nga katawhan an mapagdesisyon ha pagbag-o han aton katilingban ngan mismo lab-as pala nga ginhimo han katawhan ha Tunisia ngan Ehipto ha arabya nga mga nasud an mga rebolusyon nga nagngungoy han pagbabag-o ngan pag-usawag han panginabuhi ngan kabutang han nagkukuri nga masa,” dugang pa ni Lebico.

 

Kun mahanunumduman yana nga maabot nga Pebrero 25, 2011 amo an ika-25 na katuig han EDSA People Power Revolution nga nagpatalsik han diktadorya nga Marcos ngan nahimo nga ehemplo han mga nasud ha kalibutan para ipakigbisog an mga katungod han katawhan sugad nala han nahihinabo yana ha mga nasud han middle east.###

 

SOBRA TULO (3) KA BILLION KA PESOS KADA TUIG AN KIKITAON HAN KOMPANYA HA MINA HA PRODUKSYON HAN MAGNETITE SAND HA LEYTE

TACLOBAN CITY – Ura-ura ka guti an ginhahatag nga investment han mga kompanya han mina kun paghihisgutan nala an mahihimo nga kita han probinsya o bungto nga apektado han makahiribang nga pagmimina han magnetite sand ha Leyte kumpara han ira hahakuton nga kita tikang han nasabi nga mina.

Kun pagbabasaran an pahayag han Northern Access Mining Incorporated o NAMI nga target nira an 1.2 million ka tonelada hin magnetite sand kada tuig nga produksyon, maabot hin P3.612 billion kada tuig an kikitaon ha pinakahamubo nga estimate kun aada la ha $70 kada tonelada an pinakahamubo nga presyo han magnetite sand ha international nga merkado, sobra kadako ini nga ganansya kumpara la han pira ka milyon ka pesos kada tuig nga gastos han kompanya han mina ha aton rehiyon.
“Bisan pala ha karukayaknon han kita grabe na nga ginhuhuthutan an katawhan Pilipino hin super nga ganansya tikang ha aton mga natural nga karikuhan, labot la ini han permanente nga pagkaruba han aton kalibungan nga diri mababaydan hin bisan pira ka bilyon nga salapi,” pahayag ni Nestor Lebico, Secretary General han Samahan han Gudti nga Parag-uma ha Sinirangan Bisayas o SAGUPA-SB.
Pagmalatumat pa ni Lebico nga basar han pahayag han Mines and Gescience Bureau o MGB yana nga bulan han pebrero ha aton rehiyon, aada na ha commercial nga lebel an nakuha nga permit han NAMI ngan kaupod hini an NICUA Mining Corp. ngan an Strong Built (Mining) Development Corp. nga mayda na kapasidad nga magbaligya hin pira ka tonelada hin mina ha iba nga nasud labi na an megnetite sand.
Pagsaysay pa ni Lebico nga bisan paman han waray pa mahatagi hin commercial nga permit an pira nga kompanya hin mina ha aton rehiyon in nahihireport na han mga tawo nga naghahakot na ini hin tagpira ka tonelada nga mina ngadto ha iba nga nasud sugad nala han nahitatabo ha Este han Samar, Dulag ngan MacArthur ha Leyte nga barko na an naghahakot hini.
“Waray na iba nga rason han aton gobyerno labi na an aton nga mga Local government Unit o LGU ha aton rehiyon nga diri pugngan an pagmimina ha aton dapit, ha duro kadehado nga kita han aton lokal nga gobyerno tikang han aton kalugaringon karikuhan ngan mas labi na nga ha diri pala maiha nga panahon in nakita ta na an  grabe nga epekto han pagkaruba han aton kalibungan han nahitabo pala nga grabe nga babaha ha bug-os nga rehiyon-8,” pagtatapos ni Lebico.###

KURAPSYON NGAN PANALAPAS HAN TAWHANON NGA KATUNGOD HAN MILITAR SALAMIN HAN MAITOM NGA SISTEMA HAN MILITAR

TACLOBAN CITY – Nahisamwak ha katawhan an maitom nga sistema han aton pwersa armada han Pilipinas nga ha pinakabag-o nga higayon mismo tikang ha hataas nga posisyon han militar an nagpahayag han grabe nga kurapsyon han mga heneral ni anay Presidente Arroyo.


Labot han pagkawat han salapi han katawhan, maiha na nga sistema han militar an diri pagrespeto han tawhanon nga katungod sugad nala han nahitabo han Palo Masaker, an kamatay nira Prof. Leonardo Co ngan an pagpatay ngan pangastigo ha mga parag-uma ha diri pala maiha nga panahon ha Las Navas, Northern Samar.
“Diri la pagkawat han pondo han katawhan kundi pati an sistematiko nga panalapas han tawhanon nga katungod an angay liwat ibuksas ngan puohon ha sistema han militar nga waray iba nga nagmamando mismo kundi an mga aada ha hagtaas nga posisyon han pwersa armada han Pilipinas,” pahayag ni Nestor Lebico, Secretary General han Samahan han Gudti nga Parag-uma ha Sinirangan Bisayas o SAGUPA-SB.
Pagmalatumat ni Lebico nga milyones an nawawara han pondo han militar tungod kay ginkukumbert ini ngadto hin mga maanomalya nga transaksyon, mga pasalubong ngan pabaon nga sistema, mga anomalya ha pagpalit hin higamit militar ngan damo pa nga iba nga sistema nga ginpahayag na hadi pa labi na han mga nagrebelde nga Magdalo.
“Gin-aayat namon an pamunuan ni Pres. Aquino nga diri na uwaton an katawhan Pilipino ngan magpursige nga paraon na an maitom nga sistema nga nagpuputos han bug-os nga institusyon han militar labi nga an bag-o nga Oplan Bayanihan han militar in klarado nga diri magsosolbar han ugat han kakablasan kay ginpapahayag mismo hini nga Oplan Bayanihan nga an kakurian han kadam-an in aada la ha huna-huna han tawo ngan diri ha kongkreto nga pan-ekonomiya nga kabutang,” pagtatapos ni Lebico.###