HIN-O BA AN TINUOD NGA BOSS NI P-NOY HA IYA YANA IKA-3 NGA SONA?

TACLOBAN CITY – Duha (2) na katuig an naglabay ha administrasyon ni P-Noy ngan ha pira pala ka adlaw kahuman han iya State of the Nation Address (SONA) han lunes dako an pagduda han katawhan labi an sektor han mga parag-uma ha aton rehiyon nga an tinuod nga Boss ni P-Noy amo an mga dagko nga agaron maytuna, mga dagko nga negosyante ngan an langyaw nga mga kapitalista sugad han Estados Unidos (US).

 

“Waray pulos an iya ginhahambog nga pag-uswag han aton ekonomiya ha katawhan tungod kay para ini ha interes han dagko nga mga negosyante labi na an mga langyaw nga mga kapitalista sugad nala ha industriya han pagmimina ha aton rehiyon,” pagsaysay pa ni Nestor Lebico, Secretary General han Samahan han Gudti nga Parag-uma ha Sinirangan Bisayas o SAGUPA-SB.

 

Pagmalatumat pa ni Lebico nga an ginhahambog nga pagdayaw han mga ekonomista nga langyaw ug pagpahataas han rating han Pilipinas in pagpahinumdom la han mga kapitalista nga dapat mas umabuyon an aton gobyerno ha mga dikta han pangkalibutan nga kapitalista nga ginduduminaran han US para mas nga ig-abre pa an aton ekonomiya ha  monopolyado nga merkado ngan kawaton an aton mga hilaw nga rekurso.

 

Dugang pa ni  Lebico nga basar han ginpagawas nga datos han IBON Foundation yana nga tuig, dumoble an kita han 40 nga mga pinakariko ha Pilipinas tikang US$22.8 billion han 2010 ngada ha US$47.4 billion yana nga 2012, butang nga diri madidiwara nga an mga riko la an nagtitikariko ngan nauswag ha aton sosyedad.

 

Pagsaysay pa ni Lebico nga ginbabaliwaray ni P-Noy an pinakamayor nga problema han katawhan nga amo an tinuod nga reporma ha tuna, ngani naabot ha lima (5) katuig an backlog hini ha ira target yana nga 2014 nga bisan unob nga waray ngani ha target pagdistrebwer han hagluag nga katunaan han mga dagko nga agaron maytuna sugad nala han iya mga kapamilya nga Cojuangco.

 

Dugang pa ni Lebico nga an kamatuoran waray lugod boses an iya kuno ginsesering nga mga Boss tungod kay ha duha (2) ka-tuig niya nga paglingkod kumo presidente waray niya pamatii an tinuod nga ungara han katawhan.

 

“Waray pinag-iba an mga magtam-is nga pulong ni P-Noy ha naglabay nga mga rehimen ha panahon hin SONA ngan segurado la nga ha pamulitika an interes han aton mga lider han aton nasud, magpapabilin ini nga inop ug utod nga mga saad ngan segurado la an kawaray pag-uswag ngan mas grabe pa nga kakurian an dadangatan han kablas nga katawhan,” pagtatapos ni Lebico.###

Image

Advertisements

WANG-WANG HAROS AN DUHA KA TUIG NGA PAGSERBISYO NI P-NOY HA PARAG-UMA!

TACLOBAN CITY – Waray nakita nga progreso ha sektor han mga parag-uma an duha ka tuig nga paglingkod ha poder ni Presidente Benigno Aquino III. Landaw hini an haros wang-wang nga perpormans ha karukayaknon ha pagdistribwer han tuna ngadto han paghatag hin serbisyo-sosyal ha katawhan.

“Inabat namon nga mga parag-uma nga an pangobyernuhan ni P-Noy waray magdara han interes han katawhan kundi ha iya Boss – an mga dagko nga agaron maytuna ngan an Estados Unidos. Mas naggrabe lugod an amon inaabat nga kagutom ngan kakablasan tungod kay an mga programa ni P-Noy diri nakasentro pagsolbar han amon ungara – an magkaada kalugaringon TUNA, “ pahayag ni Nestor Lebico, Secretary-General han Samahan han Gudti nga Parag-uma ha Sinirangan Bisayas o SAGUPA-SB.

Pinaka-kulelat an rehimen ni Aquino II kun ha karukayaknon ha distribusyon han tuna ha ilarum han CARP, naabot la hin 13, 819 ektarya kada bulan abereyds nga distribusyon tikang han Hulyo 2010 – Setyembre 2011. Mas dako pa ngani an abereyds nga distribusyon han dati nga presidente Gloria Arroyo nga naabot hin 17,311 ektarya kada bulan.

Ha Sinirangan Bisayas, dida han Abril 2012 mayda pa 66,252 ka ektarya o 13.5% nga tuna an kinahanglan maidistribwer tubtob ha pagtapos hini ha 2014. Usa an probinsya han Leyte han 21 nga probinsya nga natukoy nga mayda pinakadako nga balanse han kinahanglan pa maidistribwer ha bug-os nga nasud ngan usa na dinhe nga dapat igdistribwer na an 429 ektarya nga tuna ha Leyte Sab-a Basin.

Signipikante nga umubos yana nga tuig an Gross Domestic Product ngadto ha 11.6%, pangilal-an nga waray hini atamana an sektor han agrikultura nga amo an dako an kontribusyon ha ekonomiya ngan makakahatag hin damo nga oportunidad hin pagtrabaho.

Lumuros hin 66%-71% an produksyon han abaka tungod han peste nga bunchy top ngan abaca mosaic. Ika-duha nala kita ha Bicol ha produksyon han abaka yana tikang ha panguna naton ha mga naglabay. Tikang pa hadto, hamubo la gihap an presyo han kopras. Diri pala maiha umubos hin 230% ha pag-eksport hin lana tikang ha lubi an rehiyon. An Europa komo nangunguna nga nag-iimport hin lana ha nasud in waray kita yana makag-suplay. Maabot la 24, 200 metriko tonelada an aton nahi-eksport han syahan nga quarter yana nga tuig.

Gintatagan wada an pagbalyo han gamit han tuna ngan an pagbalyo han gintatanom ha tuna kun diin nagtitikaguti an natatamnan hin humay ngan utanon para ha lokal nga pagkonsumo. Landaw dinhe an pagtanom hin robusta coffee ha 200 ektarya nga katunaan ha Northern Samar nga papaliton han Nestle. Ika-duha an makahiribang nga pagmimina nga kon diin maabot 507,746.4729 ektarya hin tuna o 24% an mayda mining tenements (aprubado ngan may aplikasyon) tikang ha kabug-usan nga kahiluag han tuna ha rehiyon. Ngan mas papadig-unon pa ini han Executive Order 79 nga bag-o nga gin-aprubahan ni P-Noy.

Waray epektibo nga naipatuman ni P-Noy an iya ginbabandera nga 4Ps nga magsosolbar han kakablasan han kada Pilipino tungod kay hataas la gihapon an ihap han pamilya nga nagugutom nga umabot na ini yana ha 7% o 760,000 ka pamilya ha bug-os nga Visayas. Dako gihapon an ihap han malnutrisyon ha kada bata nga umabot hin 21.54% nga kon diin Samar an nanguna hini ha bug-os nga nasud.

Ha hisgutanan han katungod pantawo, ha masobra 300 nga detenido-pulitikal, 107 an nahirekord ilarum ni P-Noy, 11 an preso yana ha rehiyon. Kasagaran hini nga mga detenido-pulitikal in mga parag-uma. Usa na dinhe hira Dario Tomada ngan Oscar Belleza.

Ha luyo nga bahin, an karikuhan nga nahimo han pinakariko nga 40 nga pamilya lumubo ha sulod han 2 katuig ni Pres. Aquino II. Tikang US$22.8 billion nga nahi-report han 2010 humitaas ini hin US$47.4 billion yana nga 2012. Tumubo hin US$24.6 billion o 108%.

“Waray katagi hin lugway o tsansa makagawas ha kagutom ngan kakablasan pamaagi hin trabaho nga makakabuhi o pagkaada hin kalugringon nga tuna an katawhan Pilipino lugod an daan na mga riko nga pamilya hira an klarado nga umasenso,” dugang nga pahayag ni Lebico.

Klarado na an mensahe han iya popular nga linya nga “Kayo ang Boss Ko” ngan an “Matuwid na Daan”. Natanggal na an kan P-Noy maskara nga nagtatago ha nawong han iya kag-anak nga tapag-undong kuno han makabag-o nga demokrasya han nasud. Ini an “Matuwid nga Daan” han US-Aquino II nga rehimen — an duroy nga magluludlod ha kakurian han daan na makuri nga kahimtang han mga parag-uma. Nag-NOYNOYING hi Aquino II ha mga araba ngan demanda han katawhan Pilipino.

“Mentras an kanan nasud pag-uswag napupudngan para mapaurog ngan para mapadayon an kontrol ug ganansya han mga langyawanon nga negosyo ug han ira mga kasosyo ha gawas ug sakob han gobyerno. Mentras an mga parag-uma, waray kalugaringon nga tuna. Waray makahulugan nga pag-uswag. Waray makahulugan nga demokrasya. Waray makahulugan nga kamurayawan. Palpak an 2 ka tuig nga pagserbisyo ni P-Noy ha katawhan Pilipino. Sanglit panawagan la gihapon han sektor han parag-uma an pagsasabalaud ha gilayon han Genuine Agrarian Reform Bill o House Bill 374. Pagsabalaud han Peoples Mining Bill of 2011. Pagbasura han CARP/CARPer, Mining Act of 1995,” pagtatapos ni Lebico.###

WARAY PULOS AN EO 79 KUN IGPAPADAYON AN SOBRA 507, 746 KA EKTARYA HIN KATUNAAN HA REHIYON-8 HA PAGMIMINA!

TACLOBAN CITY – Waray gamit an EO 79 ni P-Noy ha katawhan ha Rehiyon-8 tungod kay ginklaro mismo han Malakanyang nga magpapadayon an nahi-una nga nga aplikasyon ngan aprobado nga aplikasyon ha pagmimina ha aton dapit.

“Pa POGI points nala ini ni P-Noy labi ha iya tikaharani nga SONA tungod kay mas nagtitikahaluag an pag-ato han katawhan kontra han makahiribang nga komersyal nga pagmimina,” pahayag ni Nestor Lebico, Secretary General han SAGUPA-SB.

 

Pagmalatumat pa ni Lebico nga an na-eksister nga aprobado ngan aplikasyon ha pagmina ha aton rehiyon in igsakto na nga makuha an kadam-an nga rekurso ug karikuhan han Sinirangan Bisayas ngan ha dayuday magruba han kinabuhi, urukyan ngan pakabuhian han mga taga Samar, Leyte ngan Biliran.

 

Pagsaysay pa ni Lebico nga panlipat la an EO 79 kay samtang may moratorium kuno ha pagmimina may pagtugot naman ini ha aplikasyon ha eksplorasyon ha pagmina nga ha eksperyensya ha aton rehiyon hini pala nga lebel han pagmimina tone-tonelada na hin mineral an ginhahakot han mga dagko nga kompanya hin mina. An makukuha nga 5 ngadto ha 7 % nga royalty tax in gutiay la nga kita han gobyerno kontra han mahihimo nga kita han mga kapitalista ngan destroso hini ha aton kalibungan.

 

“Mas nagtitika-klarado ha katawhan an maka-dayuhan o pag-ugop ha mga kumpanya han mina an tindog ni P-Noy ngan pagbaliwaray han naghihimaruydoy na nga kabutang han mga kablas nga katawhan labi an sektor han parag-uma ha aton rehiyon,” pagtatapos ni Lebico.###

PAG-ARESTO HAN DATI DEPUTY SECRETARY-GENERAL HAN SAGUPA-SB, GINKOKONDENAR!

TACLOBAN CITY – Ginkokondenar han Samahan han Gudti nga Parag-uma ha Sinirangan Bisayas o SAGUPA-SB an pagdakupa kan Francisco J. Baylon ha kaso hin panmatay ngan atentar pagpatay subay ha mandamyento de aresto ni Judge Turla han Laoang, Northern Samar dida han Hulyo 6, 2012.

“Hi Francisco Baylon nagin Deputy Secretary-General han SAGUPA-SB ngan nagresign hiya han tuig 2008. Subay han iya iginpakita nga pamatasan han natrabaho pa hiya ha SAGUPA-SB waray kami nakikita nga basaranan nga hiya madadabi hin panmatay basar han nakapatik ha mandamyento de aresto kay tubtub han opisyal hiya han SAGUPA waray niya kriminal nga kaso nga nasangkutan” siring ni Nestor Lebico, Secretary-General han Samahan han Gudti nga Parag-uma ha Sinirangan Bisayas o SAGUPA-SB.

“Kahuman niya pagresign ha SAGUPA-SB, nahibaruan namon nga nagprobar hiya magniru-negosyo ug nagtrabaho ha usa nga NGO ha Southern Leyte para makaataman han iya pamilya,” dugang pa ni Lebico.

“Nagsususpetsa kami, subay han nahitatabo han iba liwat nga rehiyon ha bug-os nga Pilipinas, an pag-aresto kan Francisco Baylon usa la nga pitad ha legal offensive para ig-harass an SAGUPA-SB para diri epektibo nga makatindog pagbulig han mga gintitiyupi nga mga gudti nga parag-uma,” pagtatapos ni Lebico. Kun mahinunumduman, hi Dario Tomada nga founding Secretary-General han SAGUPA-SB ngan hi Oscar Belleza nga Bise-Tsirman han Alyansa ng mga Mag-uuma Alang sa Reporma sa Yuta (ALMARYU, pan-isla nga pormasyon han SAGUPA ha Leyte) presente nga nakadetenir ha Manila City Jail mahitungod ha hinimo-himo nga kaso pareho han ginhimo han estado yana han dati nga Deputy Secretary General nga hi Francisco Baylon.

Hugot nga ginkokondenar ini han SAGUPA nga diri makatadungan nga pitad han estado kontra han ranggo han mga parag-uma nga lehitimo nga nakikigbisog para ha pagkab-ot han tinuod nga reporma ha tuna. Ginpapanawagan han SAGUPA an dagmit nga pagpagawas han mga dati nga lider-parag-uma nga hira Francisco Baylon, Dario Tomada, Oscar Belleza ngan iba pa nga mga politikal nga mga preso. ###

KONTRA-KAKABLASAN NGA PROGRAMA NI P-NOY WARAY EPEKTO HA BISAYAS, IHAP HAN MGA NAGUGUTOM NGA PAMILYA NAGTIKAHITAAS!

TACLOBAN CITY – Waray gamit para ha mga taga Visayas labi na dinhe ha rehiyon 8 an mga ginpapatuman nga kontra-kakablasan nga programa ni Presidente Aquino tungod han padayon nga paghinitaas la gihapon han ihap han mga pamilya nga nagugutom.

Basar han ginkondukta nga surbey han SWS yana nga Mayo 2012, tikang ha 10.3% o 399, 500 nga pamilya nga nagugutom dida han Marso 2012, humitaas ini hin 7% (17.3%) o 670, 000 ka pamilya an nagbaton ha surbey nga hira in nagugutom la gihapon.

“Diri epektibo ngan inutil an gindesinyo nga mga kontra-kakablasan nga proyekto han rehimen Aquino tungod kay waray ini magbaton han grabe nga kagutom nga naeeksperyensyahan han katawhan labi na ha rehiyon 8,” pahayag pa ni Nestor Lebico, Secretary-General han Samahan han Gudti nga Parag-uma ha Sinirangan Bisayas o SAGUPA-SB.

Kon kikitaon, an Bisayas haros paglukupon han mayda mga aprubado han pagmimina nga magdudurot unta hin kauswagan ngan damo nga trabaho para ha milyon-milyon katawo ha Visayas pero kabaligtaran an nahitatabo kundi mas nagludlod pa ha kakurian ngan kagutom ha mga katawha.

“Buwa an ginsisiring nga magdudurot hin kauswagan an pagmimina nga usa han gin-uundong han rehimen Aquino nga magsosolbar han kakablasan ha bug-os nga Pilipinas. Klaro nga kon diin an mayda nahurak nga pagmimina, aadto man liwat an dako nga tantos han kakablasan ug nagugutom” dugang pa ni Lebico.

“Diri angay ipanhambog han Malakanyang nga nagana na an ira mga proyekto pankauswagan lugod mas tagan gin pagtagad o tutok an sektor han agrikultura nga amo an mayor nga iginkakabuhi han dako nga populasyon dinhe ha Pilipinas. Ihatag an mga suporta-serbisyo para ha mga parag-uma nga igkakabakyang nira samtang ginbubuhi nira an katawhan Pilipino ngan an pagpapatuman han tinuod nga reporma ha tuna nga amo an tumpak nga solusyon han gin-aabat yana nga kakablasan ug kagutom. Sanglit nananawagan kami nga ibasura an CARPer ngan igsabalaud an Genuine Agrarian Reform Bill o GARB,” pagtatapos ni Lebico.###