4Ps DIRI SOLUSYON HAN KAKABLASAN, KRISIS HA KAPASKUHAN (KRISISMAS) NAGPAPADAYON

TACLOBAN CITY – Pira pa nga Krisismas an maabot ha katawhan Pilipino labi na ha aton rehiyon? Amo ini an dako nga paki-ana han mga parag-uma ha bug-os nga rehiyon-8 ha pagselibrar han kapaskuhan yana nga tuig.

Hababaw nga pagkita han opisyales han aton gobyerno nga pinaagi hini nga tinatawag nga  Conditional Cash Transfer (CCT) sugad han Pantawid Pamilyang Pilipino Program (4Ps) masosolbar an kakurian han katawhan, nagpapakita la ini nga diri seryuso, harapaw ngan waray ha kongkreto nga kondisyon an ginhahatag nga solusyon ha mga batakan nga gin-uungara han katawhan.

“Samtang nagpapabilin an interes han mga kapitalista, labi an dagko nga langyawanon, kakunsabo an mga dagko nga agaron maytuna ngan burukrata nga aada ha poder han aton gobyerno, waray hingaradtuan an 4Ps kundi panhugay la para wad-on kita ha tinuod nga kauswagan,” pahayag ni Nestor Lebico, Secretary General han SAGUPA-SB.

Tinuod nga reporma ha tuna, tinuod nga industriyalisasyon, tinuod nga paghahatag han mga batakan nga sopurta ngan serbisyo sosyal, tinuod nga hustisya ngan tinuod nga panlulugaring han aton nasud nga libre han dikta han mga langyaw an gin-aaro han masa nga Pilipino.

Ha pira pala ka-adlaw an naglabay, ginhahambog han Department of Social Walefare and Development (DSWD-8) ha aton rehiyon nga target han ahensya nga paraon an baynte porsyento (20%) nga kakablasan ha rehiyon-8 ha maabot nga 2015 basar han target han Millennium Development Goals (MDGs) han United Nation (UN) pinaagi han pagpapatuman han tinatawag nga 4Ps.

“Ha spirito han malamrag nga Kapaskuhan tama la nga ipakigbisog an aton mga katungod sugad han sistematiko nga pagtalapas han aton tawhanon nga mga katungod ug labi na an socio-economico nga mga katungod nga hasta ngada yana ginhahalot han aton gobyerno,” pagtatapos ni Lebico.###

Advertisements

PAGPARA HAN MILITARISTA NGA HUYOB NGAN PAGBASURA HAN OPLAN BANTAY LAYA HA BAG-O NGA REHIMEN AQUINO AN SOLUSYON HAN KAKURIAN, KAKABLASAN NGAN KAMURAYAWAN HA KATAWHAN HAN REHIYON-8

TACLOBAN CITY – Nagtutuo an mga parag-uma ha bug-os nga rehiyon nga diri solusyon an militar nga kusog han gobyerno sugad nala han pagpapatuman han Oplan Bantay Laya (OBL) han rehimen Aquino labi na ha Norte han Samar para solosyunan an kasamok ha aton rehiyon tungod ha kamatuoran mas nagpapagrabe pa lugod ini han maiha na nga kakurian, kakablasan ngan kasamok han katawhan.

An grabe nga haluagan nga operasyon militar ha Norte han Samar in mas naghahatag pa hin grabe nga distroso ha mga parag-uma labi an hisgutanan ha seguridad ngan pan-ekonomiya nga kabutang han mga parag-uma tungod han militarisasyon ha kabaryuhan.

“Anu pa man an kabubwason han mga parag-uma kun mismo ginhihibang an amon mga pananom ngan napipiritan kami nga diri maataman an amon pangabuhian tungod han panhulga, pangastigo ngan panmatay han militar?,” pahayag ni Nestor Lebico, Secretary General han SAGUPA-SB.

Dako nga ihemplo an nahitabo nga pagpataya kan Turib Diaz Dela Cruz, usa nga taga Brgy. Mahanud, Matuginao, Samar nga parag-uma, ha Brgy. Poponton, Las Navas, Northern Samar dida han kaagahon han December 4, 2010 ha pantalan mismo han baryo pinaagi hin pagbunobunoa ha damo nga parte han lawas hini.

Gintutuohan han mga molopyo han Brgy. Poponton nga mga taga 87th IB han militar ha aton rehiyon nga hadto nga panahon in nakada ha baryo an suspetsado tungod kay han mahitabo an pagpataya in gilayon nga gumawas ha baryo an mga tropa han militar ngan mismo gindid-an han sundalo an usa nga parag-uma nga kumadto ha harani han panhitabo ngan an pinakagrabe kay klarado ha mga taga Poponton nga hi Turib Diaz in may deperensya ha panhuna-huna.

Klarado nga nagkukuri ngan lubong ha utang an mga kablas nga parag-uma ha Las Navas, an kita nga P30 kada adlaw ha lubi in diri ngani makaka-akos han pagkaon han usa nga pamilya ha kada adlaw ngan kun ha pag-abaka naman in mismo aada ha P50 kada adlaw an pirde an nahingangadtuan tungod han kahataas han gastos ha abaka kompara han presyo hini ha merkado.

“Dako liwat nga ginkakahadlok han mga parag-uma an paggamit han mga pansibilyan nga kagamitan sugad nala han sarakyan, eskwelahan, dancing hall ngan mismo mga balay han parag-uma han mga sundalo tungod kay klarado ini nga ginhihimo nga taming an mga sibilyan labi na kun nasalado an mga armado nga militar ha mga parag-uma nga diri naka-uniporme,” dugang pa ni Lebico.

Kun mahanumduman nga hadi nga naglabay nga mga bulan tikang han Agusto 2010 in nagreklamo an mga parag-uma han Las Navas ha kahanginan ngan iba pa nga media tungod han panalapas han mga militar ha mga parag-uma sugad nala han pagruba han mga pananom, pangawat, panarhug ngan mismo pangastigo ha mga parag-uma ha ira mga operasyon.###