HACIENDA LUISITA MASSACRE DIRI LA SIMPLE NGA PANHITABO NGA MAGNGANGARAT HAN DULAW NGA PRESIDENTIABLE

TACLOBAN CITY – Natuod an mga parag-uma ha rehiyon-8 nga an panmatay han mga parag-uma ha Hacienda Luisita usa nga hilarum nga basaranan nga an usa nga lider waray kapas magdara han tinuod nga interes han kablas nga katawhan ngan nagpapakita han waray kakayahan solbaron an sugad nga samwak nga panhitabo ha aton katilingban.

Magngangarat ini nga panhitabo diin man mahingadto an dulaw nga presidentiable labi na tungod kay ha siyam (9) ka-anyos hini nga pagka-kongresista han Tarlac, diin nahitabo an massacre, waray ini maghatag hin solusyon lugod nagpabor han grabe nga paghuthot ngan paniniyupi han mga dagko nga agaron maytuna sugad han Cojuangco-Aquino.

“Kinahanglan ibalik an tuna han mga parag-uma ha Hacienda Luisita kay gin-agaw ini han mga Cojuangco-Aquino ha mga parag-uma, ngani an pakautang ha bangko han mga Cojuangco-Aquino in mayda kasarabutan nga papautangon hira ha basaranan nga ipanhahatag na an tuna ha mga organisado nga parag-uma” pahayag ni Nestor Libeco, Secretary-General han SAGUPA-SB.

Nakikita pa ngani han mga parag-uma nga an nagpapaluyo han dulaw nga presidentiable in mga kontra-parag-uma labi na an tinatawag nira nga “Big Man ha Senado” kay hiya mismo ini an naghimo han DOJ Opinion 44 han panahon ni anay pangulo Cory Aquino nga naglelegalisa han hagluag nga kumbersyon han agrikultural nga katunaan ha bug-os nga Pilipinas.

“Diri na masuber ha mga parag-uma an islogan han dulaw nga presidentiable nga diri hiya mangangawat kay maiha na hira nga nangawat ha kusog pagtrabaho han mga parag-uma para magriko an mga Cojuangco-Aquino, pati ngani kinabuhi in gin-kawat pa nira” dugang pa ni Libeco.

Ini nga panhitabo in waray duda nga mahihimo pa niya kun magpapabilin hiya nga malingkod ha gobyerno sugad nala han panhitabo dinhe aton nga dapit han Leyte Saba Basin nga lugar diin mismo an aada nalingkod ha poder han gobyerno an nagmalahimo nga mangagaw hin tuna ha mga kablas nga parag-uma.

Mahinunumdoman nga nangunguna ha surbey an dulaw nga presidentiable ha iya propaganda nga “matadong nga dalan ngan diri mangangawat ha katawhan”, nga tarehas han iya iginpakita ha eksperyensya ngan kakayahan.

Advertisements

PSYWAR NGA OPERASYON HAN MILITAR NGAN GOBYERNO KONTRA HAN MGA PROGRESIBO NGA PARTYLIST NGAN KANDIDATO DISPERADO NGA NAHURAK HA REHIYON-8!

TACLOBAN CITY – Disperado nga nahurak na liwat labi yana nga pira nala kaadlaw an tiarabot nga piniliay, an mga mag-iha na ngan pautro-otro nga psywar han militar ngan mga ahente han gobyerno para dauton an mga progresibo nga kandidato ngan partylist ha aton rehiyon.

Ginpakita han militar ngan mga galamay hini an mahugaw ngan malisyoso nga pagsumpay han legal ngan diri armado nga mga indibidwal ngan progesibo nga grupo han aton sosyedad, ha mga armado nga grupo sugad nala han NPA ha mga pagpipintura hini ha mga campaign materials ngan surat nga naghahadlok ha mga progresibo nga grupo ngan indibidwal ha mga nakalabay nga semana yana nga bulan.

“An panurat ha mga kapitan nga diri botosan an mga progresibo nga partylist ngan indibidwal nga target han estado in diri la yana nga panahon ngan diri la dinhe ha aton rehiyon kundi samwak ini nga maaraot nga taktika han militar ha Luzon, Visayas ngan Mindanao para hadlukon an katawhan” pahayag ni Frank Falguera, Secretary-General han ANAKPAWIS-EV.

Nahisamwak pala ha diri maiha nga panahon an usa nga panarhog nga surat han legal council han mga parag-uma nga hi Atty. Katrina Castillo ngan yana mismo ha bug-os nga mga kapitan ha Norte han Samar nga nagwa-warning ha mga kapitanes nga kun bumutos ha mga progresibo partylist ngan indibidwal in suspek nga NPA.

“Diri mapupugngan an tinuod nga boses han katawhan han mga naghahadi ngan hakug ha aton katilingban, napamatud-an na ini bisan ha panahon nga waray tagi hin pondo an mga progresibo nga partylist ha kongreso sugad han ANAKPAWIS, pagpreso ngan pagpatay han mga lider hini han rehimen US-Arroyo, lugod nagpapabilin an kadig-on ngan determinasyon para tumindog ngan atuhan an mapaniyupi nga sistema ngan balaud ha katilingban” dugang pa ni Falguera.

Mahinunumdoman nga ha kada panahon han eleksyon dako an kahadlok han mga agaron maytuna ngan burukrata kapitalista ha kongreso, senado ngan malakanyang nga umungbaw an tinuod nga interes han katawhan sanglit desperado ini nga nagmamalahimo nga dauton an mga progresibo nga hugpo.

MILITAR DIRI NAGDADARA HAN TINUOD NGA REPORMA HA TUNA NGAN KAUSWAGAN HAN MGA PARAG-UMA HA REHIYON-8!

TACLOBAN CITY – Klarado ka upay an mga pahayag han mga militar ha rehiyon-8 nga bisan-o san-o waray interes nga magdara han tinuod nga reporma ha tuna ngan kauswagan han katawhan labi na an mga kablas nga parag-uma ha aton rehiyon.

Ha pahayag ha mga media ha nakalabay nga sabado ngan domingo, lantaran nga ginkukontra han mga tagapagyakan han militar labi na hi Roberto Gacuma an maiha na nga ginhihingyap nga magkamay-ada kalugaringon tuna ngan kauwagan an mga kablas nga parag-uma ha rehiyon.

“Imbes nga suportahan han gobyerno ngan militar hini, ginpapakaraot pa lugod an mga lihitimo nga ungara han katawhan han mga lihitimo nga organisasyon han mga parag-uma ha aton rehiyon ngan sugad man han natindog nga legal council han mga parag-uma nga hi Atty Catrina Castillo” pahayag ni Nestor Lebico, Secretary General han SAGUPA-SB.

An sustinido nga pagpahayag han mga problema ha tuna, kagutom ngan grabe nga kakablasan han mga parag-uma ha rehiyon in lihitimo nga katungod labi na nga ginhahambog han gobyerno nga nag-uswag an kabutang han katawhan Pilipino ha pagdumara han US-Arroyo nga rehimen.

Mismo an mga datos han diri pala maiha nga survey han SWS in aada ha 43% han mga pamilya nga Pilipino an kalugaringon nga nagpahayag nga hira in pobre, mas grabe pa ini ha aton rehiyon diin naigo han pan-ekonomiya nga krisis, kalamidad ngan grabe nga militarisasyon ha kabaryuhan.

“Diri ginbabaton han gobyerno labi an militar an mga isyu nga gin-aaraba han katawhan lugod ira gin-iiba an storya nga ini nga mga lihitimo nga organisasyon nga nagdedemanda han tinuod nga kauswagan in ginpapaluyoan han NPA, Terorista ngan iba pa nga pakaraot para diri tagan hin tinuod nga solusyon an nasabe nga ungara han mga kablas” pagtatapos ni Lebico.

Humubas na an Surok han Pagkaon han mga Parag-uma!

TACLOBAN CITY – Humubas an tubig ha uma, naggugtak an hagna, waray tumubo ngan namunga hin tuhay an mga pananom nga humay, an mga namunga nasunog ngan nangitom an mga uhay. Ha sugad nga kahimtang lumuros hin 65% an ira ani.  Amo ini an mga makikita nga epekto han El Niño ha mga hagna nga waray irigasyon. An daan hamubo na nira nga produksyon, mas ginpahamubo pa han El Niño.

Basar han  pag-aram nga ginhimo han Samahan han Gudti nga Parag-uma ha Sinirangan Bisayas (SAGUPA-SB) ha Calbayog City, ini nga uma masobra usa la ka kilometro an kahirayuon tikang ha syudad han Calbayog. Pero han pagtikang han waray uran-uran dida han Pebrero, waray pa hira mabisita han ahensya han gobyerno nga unta manginginano ha ira. Man ngani, tikang han una haros waray hira ayuda nga nakukuha o bisan naman la pagbisita han mga natutungdan nga ahensya han gobyerno.

“An ira abereyds nga ani naabot la hin 17 ka sako ha ¾ ka ektarya, nag-aantos nala hira kay waray man papaibhan. Sanglit ha yana nga naatake an El Nino ha kaumahan, dako gud an distroso ha ira pananum. Han yana nga kat-ani, 5 nala ka sako nga humay an ira naani. Dako nga kalugian ha ira parte kay mabahin pa hira ngadto han tag-iya han tuna ngan kulang pa hin duro an ira ani para makasapar han ira gastos ha pagtanom” pahayag pa ni Nestor Levico – Secretary-General han SAGUPA-SB.

Sanglit, gutom an ira mga pamilya yana kay waray na hira humay, waray gihap hira iparalit hin sura.

“Diri la hira biktima han kawaray kalugaringon tuna nga gin-uuma, biktima hira han pyudal nga sistema han produksyon, biktima hira han El Niño nga durot han climate change nga hinimuan han mga agro-kemikal ngan dagko nga mga kumpanya ha manupaktura nga kaudgan mga pananag-iya han mga imperyalista ngan land conversion sugad han Diversion Road Project ngan NAPOCOR. Klaro hira nga biktima han pagpasibaya han gobyerno han ira responsibilidad ngadto ha sektor han agrikultura. An calamity fund han gobyerno nahingangain daw la? Dugang ni Levico.

Kon mahinunumduman, grabe nga nakaapekto an El Niño ha bisan diin nga dapit ha bug-os nga Pilipinas ngan nagin prinsipal nga biktima hini an mga parag-uma. Dugangan pa an pagigin iresponsable han gobyerno han waray aksyon nga ginhimo para makasolbar porlo menos han gin-aabat yana nga kagutom ngan kakablasan han mga parag-uma.

SPIRITO HAN ADLAW HAN KAISOG IGPAPADAYON HAN KATAWHAN PILIPINO

TACLOBAN CITY – Ginhihinumdom naton an ika-64 ka anyos han Bataan Day yana nga Abril 9, 2010 diin yukot-yukot nga kinabuhi an naghalad han aton mga bayani nga Pilipino para pirdehon an mga mapaniyupi ngan mananakop nga langyaw.

Ginpapakita an kadig-on ngan determinasyon han katawhan Pilipino ha paglulugaring agud umuswag, ngan diri ini bulag kundi haum nga panawagan yana nga panahon nga kinahanglan magka-urusa an kablas nga katawhan para ipatuman an tinuod nga demokrasya ngan kauswagan.

“Ha damo nala nga mga anomaliya nga ginhimo han mga Tradisyunal nga Politiko ha aton gobyerno ginbabaliwaray la an nahimo nga kabayanihan han aton mga ninuno para han tinuod nga pagserbe han aton nasud” pahayag ni Frank Falguera, Secretary General han ANAKPAWIS-EV.

Damo na an naglabay nga mga rehimen kahuman han Bataan Day pero mas lugod nga nagtikakure an kabutang han katawhan Pilipino ngan mas nahimutang ini ha paniniyupi, kontrol ngan pangangawat han karikuhan han nasud Pilipinas han mga langyaw nga kapitalista.

“Ginpakita han ANAKPAWIS nga mga representante nga waray ini hira magpariko, umato ha mga anomalya han gobyerno ngan sabwatan hini ha mga langyaw ngan naghimo hin mga balaudnon ngan balaud para ha interes han katawhan” pagtatapos ni Falguera.

Mahinunumdoman nga an Araw ng Kagitingan in kada tuig nga ginhihinumdom para mag-giya ha aton han tinuod nga pagserbe ha katawhan ngan tama la nga igpadayon ini nga spirito ug kawsa para han tinuod nga pagbabag-o.

4P’s PANHAKLOP NGA SOLUSYON HAN NAGTITIKAGRABE NGA KRISIS

TACLOBAN CITY – Usa nga panmadalian nga solusyon han kagutom ngan kakablasan an yana pala nga pinahiluag nga programa han gobyerno nga 4P’s (Pantawid Panpamilyang Pilipino Program)  ha aton rehiyon.

Diri masosolbar han 4P’s an maiha na nga ugat han kakurian, an kawarayan tuna han mga parag-uma tungod han buwa nga programa ha agrikultura han gobyerno ngan kawaray pagtagad han seguridad ha pagkaon diin numero uno la gihap kita nga importer hin bugas ha bug-os nga kalibutan.

“An 4P’s in baga la hin pagtugway paglakat hin tulo (3) ka-dupa ha maabot tulo (3) ka kilometro nga San Juanico Bridge” pahayag ni Nestor Lebico, Sekretaryo Heneral han SAGUPA-SB.

Tikang dumuso an 4P’s nga programa damo na an mga reklamo nga umabot para hini, an pinakapresko an pag-gamita hini han mga politiko para han ira kandidatura nga diin diri gintatagan an diri nabutos han usa nga ma-impluwensya nga politiko nga aada ha poder ngan an mas masaklap pa an diri tuod nga paghahatag han igsakto nga kantidad nga kada ika-3 pa kada bulan an paghatag imbes kada bulan ini.

Labot han limitado nga ihap han natatagan hini diri supesyente an nakakarawat nga P1,400 kada bulan han usa nga pamilya nga mayda maximum nga tulo (3) anak nga benepesyaryo, tungod ini nga mas nagtitikamahal an aton mga papliton ngan lubong ha utang labi na an mga kablas nga parag-uma tungod han plete ha tuna ngan damo nga mga kagarastusan ha pag-uma.

“Kun seryuso an gobyerno ha pagbulig han kablas nga katawhan kinahanglan niya tagan duon an tinuod nga reporma ha agraryo nga kadungan magsosolbar han seguridad ha pagkaon ngan tinuod nga mga serbisyo sosyal diri lugod pagkurakot ha mga pondo hini” dugang pa ni Lebico.

Mahinunumduman nga yana pala nga bulan iginlakip na han 4P’s nga programa an mga sentro nga syudad ngan bungto ha aton rehiyon kaupod na an Tacloban kumo solusyon han kakurian nga ginsubad ha nasud Africa han aton gobyerno.

PRIBATISASYON HAN SEKTOR HAN ENERHIYA DIRI SOLUSYON HAN KRISIS HINI

TACLOBAN CITY – Ha diri pala maiha nga panahon haros hul-os na nga gintatag-iya han mga pribado nga kompanya an aton surok han aton kuryente ha aton rehiyon ngan mismo hul-os na nga pananag-iya an transmisyon hini. Nagpapakita ini han diri kaseryuso han gobyerno nga tagan hin solusyon an maiha na krisis han sektor kay dako nga ehimplo na an nahitabo nga pribatisasyon ha Luzon nga mas nagpahataas pa lugod han sukot ha kabaraydan ha kuryente.

Labot han gin-aantom nga paghataas pa han mahal na kupay nga kuryente ha aton dapit, iginkapa-usa ini han molopyo ha bug-os nga rehiyon-8 nga ha panahon han hul-os nga pagkotrola han mga kapitalista han aton kuryente ha aton rehiyon amo lugod an panahon han tigda la nga pagkaada black-out pira pala ka-adlaw an naglabay.

“Imbes nga himuon nga batakan nga panginahanglan an kuryente ha katawhan nga proprotektahan kunta han gobyerno, baligya na ini nga kontrolado han mga linta nga kapitalista” pahayag ni Frank Falguera, Secretary General han ANAKPAWIS-EV.

Nahibuyagyag ha puliko nga aada na ha 67% nga pananag-iya han Lopez ngan Aboitez an power generation ha aton rehiyon nga diin nagkakantidad hin 58 bilyon pesos an kapalit han EDC han mga Lopez nga babaydan sakob hin 20 ka tuig.

“Ini nga mga senaryo nga ginpapakita pala nga aga pa han mga kapitalista ha kuryente ha aton rehiyon in segurado na liwat nga mahihimo nga tungtungan han paghataas han kabaraydan ha kuryente ngan klarodo nga kartel an nakikita ta hini nga industriya” dugang pa ni Falguera.

Mahinunumduman nga tikang han marso hini nga tuig in hul-os nga nagkaada hin krisis ha kuryente ha bug-os nga Pilipinas ngan dako nga higayon han mga kapitalista nga singabuton an krisis para dagko pa nga tubo an makuha hini tikang ha mga kablas nga katawhan.