NICUA MINING CORPORATION PIRIT NGA GINBABALIKO AN KAHIBARUAN HAN TINUOD NGA EPEKTO HAN MAKAHIRIBANG NGA PAGMIMINA HA BRGY. PONGON, MACARTHUR, LEYTE!

TACLOBAN CITY – Pinaagi han Safety Manager han NICUA Mining nga hi Mr. Ver Abrugar gin-uuwat an katawhan labi na an mga parag-uma ha Brgy. Pongon, MacArthur, Leyte nga an pagkuha han tuna nga upat (4) ka metro an kahilarom in diri makakahibang ha kalibungan labi an iristoryahon han kalidad han tuna.

Kukuhaon an pira nga mga mineral sugad nala han iron ngan labi na an mga pananum, bakterya, wati ngan iba pa nga nabubuhi nga gudti nga hayop nga dako an papel han pagpapabilin han kamatambok han tuna, tarehas ini han pahayag ni Mr. Abrugar nga dire makaka-apekto ha kalidad han tuna kay ibabalik man kuno an ginkuhaan han iron nga tuna ha inukad nga parte hini.

“An epekto han 523 ka ektarya nga tuna nga mahihibang han pagmimina in dire bisan san-o masasaliwanan hin pira ka milyon nga salapi” pahayag ni Jose Tico, Tagapagyakan han SAGUPA-SB.

Ginbabana-bana nga naabot hin kwarenta (40) milyones ka tonelada an kukuhaon nga magnetite ore ngan gintatantiya nga aada hin sumobra traynta (30) ka tuig an panahon han pagkuha hini ha nasabi nga lugar. Maghahatag daw ini hin milyon-milyon nga kantidad hin sosyal nga pag-uswag para han apektado nga komunidad.

“Imposible an ginpapahayag han NICUA Mining nga magkaka-ada hin rehabilitasyon an tuna labi na kay chemical fertilizer mismo an ig-aaplay para bumalik an katambok daw hini ngan sayop nga igpahayag nga ini nga lugar in dire produktibo ha pag-uma samtang pira na ka-dekada nga nabubuhi hini nga lugar an mga parag-uma han MacArthur, Leyte” pagklaro pa ni Tico.

“Waray responsable nga pagmimina ngan sosyal nga pag-uswag samtang ginkukuha mo an karikuhan han katawhan, ginruruba mo an kalibungan ngan ginpapalayas mo an mga parag-uma ha ira umhanan, lugod iresponsable ini nga pitad para han interes han mga langyaw nga kapitalista” dugang pa ni Tico.

Mahinunumdoman nga dida han Pebrero 15, nagkaada hin gios protesta an mga parag-uma han Brgy. Pongon ha pangunguna ni Fr. Arnold Aurelio, kura-paroko han MacArthur, Leyte ngan yana nga adlaw nag-kaada hin paghuru-himangraw kabahin han pagmimina ha lugar ha pangunguna mismo ni Archbishop Jose Palma han Archdioceses han Palo.

NAGTITIKAMAHAL NGA EDUKASYON NAGDUDUSO HA MGA PARAG-UMA NGA MANGARO HIN KADUNGAN NGA SUBSIDYO KUN DIRE MAN LIBRE NGA EDUKASYON HA GOBYERNO!

TACLOBAN CITY – Labot la han grabe nga epekto han El Niño ha mga parag-uma ha rehiyon, an nagtitikamahal nga gastos han komersyalisado nga sistema han edukasyon in nagduduso pa han paghingyap hin subsidyo kun dire man mahatag han gobyerno an ginlalarang han aton konstitusyon nga libre nga edukasyon.

“Mahal hin duro an pinapalit nga edukasyon ngan dire kami kombensido han kalidad nga ginhahatag han DEPED kun naabot la ha tulo (3) kaadlaw an pagtutdo kada semana ha mga tay-aw nga lugar ha aton rehiyon” pahayag ni Jose Tico, Tagapagyakan han SAGUPA-SB.

Mismo an konserbatibo nga datos han DEPED, mayda 5.6 milyon nga waray ha eskwelahan nga mga kabataan nga nag-iedad 6 ngadto 15 ka anyos dida han tuig 2009 ngan samtang nag-aalutaga an gobyerno hin P6.00 kada adlaw kada tawo para ha edukasyon ura-ura ini ka guti han P21.00 kada adlaw ha pagbabayad han utang ha gawas nga nahingadto man la han korapsyon.

“Pagdiwara han katungod nga maka-eskwela sugad nala kan Michelle Adelantar nga ginsikmit han mga militar ha usa nga sitio han San Jose De Buan, Samar yana pala nga bulan nga imbes hatagan hin suporta ngan sosyal nga serbisyo an aton mga anak in gintatagan pa lugod hin dako nga problema han gobyerno” kadugangan pa ni Tico

Mahinunumdoman nga ha kada tuig nagtitikadako an mga kabaraydan han eskwelahan han aton mga anak bisan paman kanan gobyerno ginkakatinan labi na nga dire na liwat maiha an sunod nga school year yana nga maabot nga Hunyo 2010.

MORONG 43 SALAMIN HAN NAGPAPADAYON NGA KAWSA NGA GINPAKIGBISOG NI DR. BOBBY DE LA PAZ HA SAMAR!

TACLOBAN CITY – Magserbe ha mga kablas nga komunidad para pun-an an dire nababaton han gobyerno nga nagtitikagrabe nga kabutangan panlawas ha bug-os nga Pilipinas, amo ini an tumong ngan panalinguha han Morong 43 tarehas han pahayag han militar nga kuno mga myembro han NPA nga nagti-trining hin panhimo hin bomba.

Tikang pa hadto pirme na gintatatakan an mga tawo nga naugop han pagserbe ha katawhan sugad nala han nawara nga Dr. Bobby De La Paz nga nagtindog hin mga klinika para ha mga kablas ha Gandara ngan Catbalogan, Samar nga pirit liwat nga ginkonektar ha NPA san-o patayon han militar hadton tuig 1982.

“Bisan nala an buwa nga search ngan warrant of arrest in klaro na nga nagpapakita nga malisyoso an plano han PNP ngan AFP ha mga health workers” pahayag ni Asher Allunar, Regional Coordinator han ANAKPAWIS-EV.

Mismo an internasyunal nga komunidad nagkondena hini nga pagtamak han katungod pantawo labi kay an mga biktima an naghahatag han dire maihatag nga mga katungod han katawhan ha maupay nga panlawas. Upod dinhe an ICRC, World Council of Churches (WCC), Presbyterian Church in the United States, bugto han European Union President nga hi Christine Van Rompuy, CHR, Migrante International ngan an mga senadora nga hira Jamby Madrigal, Loren Legarda ngan Pia Cayetano.

“An gin-agian nga mental ngan sikolohikal nga tortyur ngan labi an sexual harassment han mga biktima sugad nala kan Dr. Alex Montes nga gin-kukuryente samtang ginpapakianhan in nagpapahinumdom han maitom nga experyensya han Martial Law” dugang pa ni Allunar.

Kun mahinunumduman han nakalabay nga ika-6 han Pebrero yana nga tuig in iligal nga gin-raid an balay ni Dr. Melecia Velmonte nga diin nagkakamay-ada trining an Health Alliance for Democracy (HEAD) ngan Community Medicine Development Foundation (COMMED) hin medical training nga gin-atenderan hin 43 nga mga doctors ngan health workers ha Luzon.

LEKSYON HAN EDSA 1 NAGPAPABILIN NGA PAKI-ANA HA MGA POLITIKO!

TACLOBAN CITY – Baynte-kwatro (24) ka tuig na an naglabay han igpakita han katawhan an iya bug-os nga gahum ngan tingog ha kontra-katawhan ngan madarahug nga US-Marcos nga rehimen pero nagpapabilin la gihapon ngan waray maresolba an mga batakan nga problema, kakurian ngan isyu han katilingban.

Waray mahibaro an mga Politiko han tinuod nga leksyon ngan esensya han EDSA 1, an mas klaro pa lugod yana an padayon nga pag-ginamit han nagtitikakuri nga kahimtang han katawhan Pilipino labi na yana nga panahon han eleksyon.

“Nagpabilin nala ha mga im-im, ilinupad ha hangin ngan bumuto nga bura an mga saad han mga Politiko” pahayag ni Jose Tico, Tagapagyakan han SAGUPA-SB.

Ha upat (4) nga presidente nga nagkapot han aton gobyerno mas nagtikagrabe pa lugod an kakurian han mga Pilipino; nagtikahiluag an pangangagaw han tuna ha mga parag-uma, nagtikahalarum an kontrol ha aton ekonomiya han mga langyaw, grabe nga pangawat han aton karikuhan han mga kapitalista, nagtitikahataas nga utang han aton nasud ha gawas, nagtitika-ubos nga sosyal ngan suporta nga mga serbisyo han gobyerno ngan padayon nga paghataas han extra-judicial nga panmatay ngan iba pa nga mga pagtalapas han tawhanon nga katungod nga samwak han Martial Law.

“Panahon na nga otro sukton ha naghahadi ha poder ngan mga Politiko an tinuod nga esensya han tinuod nga pagserbe han katawhan nga igin-guliat han EDSA 1 ngan ha tidaraon nga eleksyon pilion naton an magdadara han tinod nga tingog han katawhan Pilipino” dugang pa ni Tico.

Kun mahinunumduman ginpabagsak hin waray inawas nga dugo han EDSA 1 nga pag-aaklas an madarahug nga rehimen ni Marcos hadton Enero 26, 1986 nga mayor nga ginpapelan han mga kablas ngan tiniyupi nga katawhan labi na an sektor han parag-uma.

MGA LEHITIMO NGA SOSYAL NGA ISYU AN GINDADARA HAN ANAKPAWIS PARTYLIST HA KONGRESO!

TACLOBAN CITY – Dire pusil ngan kasamok an panawagan han ANAKPAWIS PARTYLIST ngan iba pa nga mga progresibo nga partylist ha kongreso ngan organisasyon ha aton rehiyon, tarehas han pahayag han militar hadi nga domingo nga kun kikitaon asya pa ngani an numero uno nga nagpapatuman han panmatay ngan kahadlok dinhe ha rehiyon-8 labi na dida han tuig 2005.

Mga lehitimo nga mga demanda han katawhan an dara-dara han ANAKPAWIS ha Kongreso ngan nasunod ini han mga balaudnon samtang naninindugan nga bag-uhon an mga kontra-katawhan mga programa ngan palisiya han gobyerno. Kun mayda man kapareho nga mga panan-aw an ANAKPAWIS ha iba nga grupo ha pag-ugop han interes han mga Pilipino, an importante nga dire gawas han Konstitusyon han Pilipinas an mga pamaagi nga ginhihimo hini.

“Kinahanglan mahibaro an mga militar ngan mga bayaran nga propagandista hini nga manawagan para han panhatag han tuna ha mga parag-uma, pagkaada seguridad ha pagkaon han mga Pilipino, pagkaada trabaho, pagpahataas han sweldo han mga trabahador, pagpahamubo han presyo han lana, pagkaada libre nga edukasyon ngan pagkaada programa ngan mga palisiya nga dire kontrolado han langayaw nga mga kapitalista, kun dire man mahimo nira ini, an segurado nala hini in ginbusog na hira han mga buwaya ngan mga buwitre nga karuyag magpabilin ha poder ha gobyerno” pahayag ni Asher Allunar, Regional Coordinator han ANAKPAWIS-EV.

Pirit nga gintatanom ha panhuna-huna han katawhan ha rehiyon-8 nga waray nahimo an ANAKPAWIS PARTYLIST ha Kongreso ngan ha katawhan ha kabug-osan labi dinhe ha aton rehiyon ngan malisyoso pagud nga ginkokonektar an progresibo nga partylist ha NPA komo naghahatag hin pusil tikang ha iya mga pondo nga nakukuha ha gobyerno.

“Dako nga buwa an ginpapasarang han militar tungod kay aada mismo ha mga report han COA ngan DBM kun nahingangain an mga pondo han mga progresibo nga partylist ha Kongreso ngani dida pa han tuig 2006 ngada yana in waray ini mahahatagi hin pondo tungod han sustenido hini nga pagkontra han kontra-katawhan nga mga palisiya han rehimen ni Arroyo” dugang pa ni Allunar.

“Pagtamak han kadaugan han katawhan nga mabatian an tinuod nga tingog ha gobyerno ngan mismo tampalo ngan pagbaliwaray ha batakan balaud han Pilipinas an ginpasamwak han mga bayaran han militar nga an pagkaada han Partylist System ha kasaysayan han Pilipinas in dako nga kasaypanan han gobyerno” pagpaklaro ni Allunar.

Dako nga papel komo kongresista nga maghimo hin balaud para ha interes han katawhan ngan pira han nga mga ginhimo nga balaudnon an pagpahataas han sweldo han mga trabahador hin P125 ha pribado (HB 1722) ngan P3,000 ha mga nagtatrabaho ha gobyerno (HB 1962), GARB (HB 3059), pagbasura han Oil Deregulation Law (HB 1724), pag-repeal han EVAT (HB 1092) ngan Emergency Relief Financial Assistance Package ha mga trabahador nga naigo han krisis ha ekonomiya ngan pinansya (HR 1233).

“Bumulig an ANAKPAWIS ha katawhan ha paghimo hin tulay, irigasyon, eskwelahan, sosyal nga serbisyo, livelihood, flood control ngan damo pa nga iba sugad nala han pira nga nahatag ha rehiyon-8 nga mga post harvest nga pasilidad, bodega hin humay, medical assistance ha EVRMC ngan scholarship ha mga estudyante” pagtatapos ni Allunar.

KADUGANGAN NGA KAKURIAN AN IGDUDUROT HAN PAGMIMINA HA MACARTHUR, LEYTE NGAN IBA PA NGA LUGAR HA BUG-OS NGA REHIYON

TACLOBAN CITY – Parag-uma ngan parupangisda an kairo han nahitatabo nga pagmimina ha MacArthur, Leyte ngan iba pa nga lugar ha aton rehiyon, magdudurot ini hin haluagan nga dislokasyon ha pakabuhi ngan pangukoy han mga kablas.

Segurado nga an maghahakot han aton karikuhan ngan higante nga ganansya amo an mga kompanya han mina sugad nala han Nicua Mining Corporation nga presente nga nagmimina ha MacArthur, Leyte ngan an segurado nga mahibibilin ha katawhan an mas grabe nga karuba han aton kalibungan labi na an kadagatan ha San Pedro Bay ha Leyte.

“Hul-os nga masuporta an SAGUPA-SB ha katawhan han MacArthur, Leyte labi na ha mga parag-uma ngan parupangisda nga direkta nga apektado han pagmimina ngan nag-aaghat kami han iba nga sektor para sumuporta sugad han ginpapakita han singbahan pinaagi han kura paruko han nasabi nga bungto” pahayag ni Jose Tico, Tagapagyakan han SAGUPA-SB.

Ha bug-os nga rehiyon aada ha 60,028.75 ka Ektarya an sakop han pagmimina nga gin-aprobahan han Mines and Geosciences Bureau (MGB) han DENR-8 nga naglalangkob han Exploration Permit (EP) ngan Mineral Production Sharing Agreement (MPSA) basar han ginpagawas nga listahan han MGB han December 31, 2009. Umabot ha 21 ka kompanya han mina an nahatagan hin permit nga nagsasakop hin maabot 37 ka munusipyo ha bug-os nga rehiyon.

“Ginruruba han mga kompanya han mina an kinabuhi han presente ngan tidaraon nga molopyo han MacArthur, Leyte, dako nga epekto ha mga parupangisda kun pag-aaliskayon han namimina an gin-uukyan han isda ha kadagatan nga ira ginpapakabuhian ngan an mga produkto han mga parag-uma ha mga umhanan sugad nala han nahitabo ha pagmimina ha Isla han Manicani ha Guiuan, Samar” dugang pa ni Tico.

Kun mahinunumduman ginpasabot han mga parag-uma han MacArthur, Leyte kaupod an suporta han singbahan kakulop nga adlaw nga magkaka-ada hira paghihimuon nga gios-protesta para pudngan an kompanya han Nicua Mining Corporation nga dire igpadayon an pagmimina han Iron o Back Sand ha ira lugar.

NAGTITIKAGRABE NGA EPEKTO HAN EL NINO USA NGA RESULTA HAN MAIHA NA NGA PAGDISTROSO HAN MGA KAPITALISTA HA ATON KALIBUNGAN

TACLOBAN CITY – Labot han lantaran nga paniniyupi ha katawhan Pilipino tungod han kontrol ha aton mga balaudnon ngan lider han aton nasud, an nagtitikagrabe nga epekto han El Niño ha aton lugar in resulta na han maiha na nga pagdistroso ha kalibungan ngan pangawat ha aton karikuhan han mga langyaw nga kapitalista labi an haluagan nga pagmimina kakunsabo an mga lokal nga politiko.

“Dire urusahon nga nagtitikapintas an mga kalamidad yana nga panahon ngan an kinahanglan naton nga lider han aton nasud in maugop han aton mga lehitimo nga katungod sugad han pagpreserbar han aton karikuhan para ha katawhan Pilipino ngan pagpugong han numero uno nga nagpapagrabe han pagbag-o han aton klima” siring ni Jose Tico, Tagapagyakan han SAGUPA-SB.

Klarado na kaupay ha mga mata han katawhan nga an numero uno nga nagruruba han aton kalibungan amo an mga poderoso nga mga dagko nga mga kapitalista ha bug-os nga kalibutan sugad han Estados Unidos ngan Japan. Ha pinaka-urhe pala nga kumperensya ha Amsterdam para pudngan an pagduro han pagbag-o han klima, in waray maghatag hin kaseguruhan an mga dagko nga kapitalista nga nasud sugad han Estados Unidos para paubsan an paghihimo han mga kemikal nga nagpapapaso han klima ha bug-os nga kalibutan.

“An mas makure pa hini kay mismo an aton mga lider in gindedepensahan pa ini nga mga langyaw nga kapitalista para rubaon an aton kalibungan ngan kuhaon an aton karikuhan, sanglit kun mayda man mga pamugong nga pitad an gobyerno ha grabe nga kalamidad in usa nala ini nga pakunsuwelo de bobo” pahayag pa ni Tico.

Kun mahinunumduman in ginbabanabana han eksperto nga an aton rehiyon in ma-iigo han nasabi nga El Niño nga mas magpapagrabe pa han kakurian han katawhan labi ha mga parag-uma tungod han distroso hini ha aton mga pananum labi na ha Samar nga isla nga aada la ha 6,033 ka ektarya an sakop han irigasyon ha 81,006 ka ektarya nga gintatamnam han humay.