IGBASURA AN KOMERSYAL NGA PAGMIMINA NGAN LOGGING HA ATON REHIYON HA PAGBATON HAN TINUOD NGA PAGHIGUGMA HAN ATON KALIBUTAN

TACLOBAN CITY – Ha pagduyog han oras han aton kalibutan o gintatawag nga Earth Hour yana nga Marso 26, 2011 mas kinahanglan hinumdomon han katawhan Pilipino an makahiribang nga pagmimina ngan komersyal nga logging kumo mayor nga hinungdan han pagkaruba han aton kalibungan.

 

Kun sugad, napapanahon na nga igbasura an ngatanan nga pagmimina ngan logging ha aton rehiyon ngan mas pa nga kinahanglan tagan duon han aton gobyerno an pag-intinde hini labi nga an nangunguna ha pagpasarang han pagsuporta han Earth Hour amo an Department of Environment and Natural Resources o DENR nga amo man liwat hiya an ahensya han gobyerno an nagtutugot han pagmina ngan logging.

 

“Labot han pagsuporta han Earth Hour mas kaangayan nga manduhan han DENR an iya ubos nga ahensya nga amo an Mines and Geosciences Bureau o MGB nga undangon na an pagmimina ha aton dapit labi nga nakita na naton an grabe nga epekto han grabe nga babaha ngan landslide ha aton rehiyon nga nagresulta na hin kaawat hin mga kinabuhi,” pahayag ni Nestor Lebico, Secretary-General han Samahan han Gudti nga Parag-uma ha Sinirangan Bisayas o SAGUPA-SB.

 

Yana nga Sabado nga adlaw in magkakaada hin usa ka oras nga pagparong han mga laga han suga ha bug-os nga Pilipinas ngan Kalibutan para suportahan an panawagan para han Earth Hour nga magsisimbolo ngan mismo mag-aamot han pagpreserba han aton enerhiya ngan kalibungan.

 

“An mas maupay nga pagpreserba han aton kalibutan an mismo diri la usa ka oras nga pagsalbar hini kundi mas aada pa ngani magtitikang ha mga programa ngan palisiya han aton gobyerno an pagtadong hini nga nagkikinahanglan hin maihaan nga pagpasantop, edukasyon ngan pagpatuman han tinuod nga pagsalbar han aton iroy nga kalibutan,” dugang pa ni Lebico.

 

Mahanunumdoman nga yana nga ika-26 han Marso tuig 2011 an paghinumdom han Earth Hour ha bug-os nga kalibutan tikang 8:30-9:30 han gab-i nga ginpartisiparan ini han iba-iba nga nasud upod an Pilipinas.###

 

Advertisements

DISTROSO NGAN KAKURIAN AN IGINDUROT HAN 16 KA TUIG NGA PAG-EKSISTER HAN MINING ACT OF 1995, ORAS NA PARA IBASURA INI

TACLOBAN CITY – Napapanahon na nga ibasura an Mining Act of 1995 ha iya ika-16 ka tuig nga anibersaryo yana nga maabot nga March 3, 2011, tungod ini kay labot han makahiribang ngan paturapak nga pagmimina ha aton kalibungan, nahimo ini nga behikulo han mga dagko nga mga langyaw nga kapitalista ha bug-os nga kalibutan nga limason an aton karikuhan ngan mas pagrabihon an nagkukuri na nga kahimtang han katawhan Pilipino.

 

“Ha pagsulod han aton gobyerno han globalisasyon nga dominado han mga dagko nga langyaw nga kapitalista, liberalisasyon ha industriya han pagmimina ha aton nasud in nagduso pa lugod han grabe ngan haluagan nga pangangagaw han katunaan han mga parag-uma nga hinungdan han grabe nga dislokasyon,” pahayag ni Nestor Lebico, Secretary General han Samahan han Gudti nga Parag-uma ha Sinirangan Bisayas o SAGUPA-SB.

 

Pagmalatumat pa ni Lebico nga dako nga ehemplo an nahitabo nga pagmimina ha Brgy. Bagacay, Hinabangan, Samar nga distroso la lugod ha kalibungan labi na an salog han Taft an igindurot hini ngan waray man liwat ini magpauswag labi na han lokal nga ekonomiya.

 

Dugang pa ni Lebico nga an pinakalab-as nga panhitabo han makahiribang nga pagmimina an nahitabo ha agrikultural nga katunaan nga gintatamnan hin humay han mga parag-uma han MacArthur, Leyte han NICUA Mining diin gintipahan han mga katawhan ha MacArthur ha suporta han simbahan, iba-iba nga organisasyon, indibidwal ngan mga Local Government Unit o LGU han probinsya han Leyte.

 

Pagsaysay pa ni Lebico nga irestoryahon yana nga panahon kay anu natugutan an NICUA Mining nga mahatagan hin komersyal nga permiso basar han pahayag han Mines and Geosciences Bureau o MGB ha kahanginan ngan an otro nga pahayag hini nga iginpadayon an gintatawag nga bulk sampling han magnetite sand basar kuno han pagtugot han MGB National.

 

“Tama na an mga leksyon han naglabay labi nga dako an pagduda han katawhan ha maanomalya nga pagtugot han pagmimina ha aton rehiyon nga aada na ha sobra 600,000 ka ektarya an sakop hini ngan waray man la pag-imbestiga an MGB ha mga report nga naghahakot na hin tinagdagko nga bulto hin mineral bisan aada pala ha exploration stage han pagmina, sobra na an paniniyupi han langyaw nga mga nagmimina ngan panahon para ibasura an makahiribang nga Mining Act of 1995,” pagtatapos ni Lebico.###