PANGUWAT AN GINHIHIMO HAN 19TH IB HA MGA PARAG-UMA HA CARIGARA, LEYTE

TACLOBAN CITY – Dako nga buwa an ginpahayag ni Col. Joel Nacnac han 19th IB kakulop nga adlaw ha usa nga istasyon hin radio nga nagka-urusa na kuno hira han mga parag-uma ha Carigara, Leyte ha pangunguna han Municipal Farmers Association of Carigara o MUFAC para han bubligay ha mga programa ngan aktibidad han MUFAC.

Pangunguwat ha mga parag-uma ha Carigara an ginhihimo han 19th IB ha pangunguna ni Col. Nacnac tungod kay grabe nga militarisasyon an nahitatabo ha Carigara nga grabe nga nakaka-apekto han pan-ekonomiya han mga parag-uma sugad nala han pagbantay ha pag-uma ngan iba pa nga panhadlok ngan saywar han mga sundalo han 19th IB.

“Diri kinahanglan an bulig han militar ha mga sibilyan nga aktibidad sugad han mga parag-uma labi na ha bantugan nga may utang nga dugo sugad nala han berdugo nga 19th IB,” pahayag ni Nestor Lebico, Secretary General han Samahan han Gudti nga Parag-uma ha Sinirangan Bisayas o SAGUPA-SB.

Pagmalatumat pa ni Lebico nga urusahon nga pitad ngan nagpapakita la hin usa nga guilty nga aksyon para hingalimtan an mga sala nga ginhimo han 19th IB ha mga parag-uma sugad nala han panmataya han mga parag-uma ha Palo, Kanangga labi na hira Professor Leonard Co ngan mismo an mga panalapas han tawhanon nga katungod ha Carigara dida pala han December 2011.

“Diri mauuwat an katawhan ha taktika han mga militar kay samtang nagpapadayon an magraot nga programa ngan palisiya han gobyerno labi na ha diri pagpapatuman han tinuod nga reporma ha tuna, magpapadayon an paningkamot ngan pag-ato han mga parag-uma sugad han MUFAC ngan samtang magpapabilin liwat nga mapanhibang nga instrumento an militar han mga kurakot ngan dagko nga agaron maytuna nga aada ha poder han aton katilingban,” pagtatapos ni Lebico.###

MAKAHIRIBANG NGA PAGMIMINA HAPSAY NGA NAKAKALUSOT HA LEYTE

TACLOBAN CITY – Pormal ngan hapsay nga nakalusot ha mga Local Government Unit o LGU han Leyte an makahiribang nga pagmimina nga ginbubuhat han NICUA Mining Corporation ha MacArthur, Leyte. Ini in mahuman nga aprobahan han nakalabay nga una nga semana han Pebrero 2012 an usa nga resolution han probinsya han Leyte ha pamumuno ni Board Member Roque Tiu kumo chairman han Committee on Environment and Natural Resources.

“Bisan han pagtikang pala han operasyon han NICUA libre ngan ilegal na ini nga nakakakuha hin tagpira ka-tonelada hin magnetite sand ha aton kalibungan pakadto ha iba nga nasud, asay pa ba yana nga kakunsabo na nira an mga LGU naton?,” pahayag ni Nestor Lebico, Secretary General han Samahan han Gudti nga Parag-uma ha Sinirangan Bisayas o SAGUPA-SB.

Pagmalatumat pa ni Lebico nga naabot na hin 30 ka ektarya hin kahumayan an sakop han pagmimina han NICUA ha MacArthur, Leyte ngan nahatagan na mismo hin Mineral Production Sharing Agreement o MPSA para han hul-os na nga operasyon han pagkuha han aton karikuhan.

Pagsaysay pa ni Lebico nga igo na ini nga santopon kunta han aton mga lider-gobyerno anu an dako nga epekto hini ha aton kalibungan kontra han aton seguridad ha pagkaon labi na nga duro na ka epektibo an grabe nga pagbag-o han aton klima labot nala han direkta nga epekto hini ha pakabuhi han mga parag-uma ngan katawhan ha bug-os nga probinsya.

Dugang pa ni Lebico nga waray pulos an ginsesering nga rehabilitasyon han mga mining nga korporasyon ngan ahensya han aton gobyerno kay maaram kita nga an pagbalik han matambok nga tuna nga gin-ukad han mina in diri derekta maliliwanan bisan paman hin usa ka-dekada, mas ginpapakita pa han NICUA an grabe nga pagpodpod hin mga komersyal nga abono para kuntaloy kitaon an maupay nga ani han ira gintanom nga humay ha lugar han ginminahan.

“Ha diri maiha nga panahon mas delubyo an aabaton han katawhan ha aton probinsya labi na ha mga parag-uma ha humay tungod kay ha bug-os nga nasud, denhe mismo ha aton probinsya han Leyte gin-pilot erya han mga dagko nga kompanya han mina an pagruba han aton mga kahumayan ug batakan nga pagkaon han katawhan,” pagtatapos ni Lebico.###