Kontra-parag-uma nga Balikatan 2017, atuhan!

Mahugot nga gintitipahan han mga parag-uma han Sinirangan Bisayas an natatabo nga Balikatan exercises ha siyudad han Ormoc ha Leyte ug ha Guiuan, Eastern Samar nga nagtikang dida han Mayo 8 ngan nakatalaan nga magtapos dida hit Mayo 19. Bisan pa man igin-hahambog han lokal nga pamunuan hini nga mga lugar ug mismo ni Presidente Duterte nga human and diaster relief an hinungdan hini nga natatabo nga buligay han Armed Forces of the Philippines ngan visiting forces, diri ta angay idiwara nga usa la ini nga pagkondisyon ha katawhan Pilipino agud himuon nga lehitimo an ira pagbase ha Pilipinas ngan tahuban an ira mga pan-aabuso ngan krimen nga ginhimo dinhi ha nasud.

18447143_1312068348840739_3875151539560489016_n

Naki-usa an SAGUPA – SB ha usa nga gios-protesta kontra ha Balikatan 2017 nga ginlansar kakulop, Mayo 12 ha siyudad han Tacloban. (Ginkuha tikang ha UP Vista)

US, ulo han mga man-made disaster ha nasud

Aada ha kadelikaduhan an mga parag-uma tungod han panginginlabot han Estados Unidos ha mga domestic affairs han nasud upod na dinhi an aktibo nga pakikig-kunsabuhay nira ha AFP nga yana ginpapamunuan ni Gen. Eduardo Ano. Hi Ano, upod ni Defense Secretary Delfin Lorenzana, an nagsusulsol kan Presidente Duterte nga tugutan an padayon nga pagbase ngan panginlabot han US ha Pilipinas. Manunumduman nga bisan han panahon nga nagdeklara hi Duterte nga posible niya paiwason an mga tropa han kano ha nasud, nagpagawas hin pahayag hi Lorenzana nga magpapadayon an pagpatuman han Enhance Defense Cooperation Agreement (EDCA) sugad han napagkasarabutan.

Bisan ha pag-aabre ni Presidente Duterte ha makawala nga grupo nga National Democratic Front of the Philippines (NDFP) hin pakig-istorya ngan pakig-negosasyon para ha pagkab-ot hin kamurayawan, nagpadayon an kontra-insurhensiya nga programa han AFP nga base han mando han ira mga agaron nga kano. Sugad han mga nauna nga kontra-insurhensiya nga programa han mga nauna nga administrasyon, an US la gihapon an ulo ngan aktibo nga nagko-kontrol ha AFP. Makikit-an nga gintahuban gihapon ini nira hin community and development programs.

Pinaagi han makusog nga kontra-insurhensiya nga programa han AFP, ha pangunguna han US, napiritan magbakwit an sobra dos mil nga parag-uma han Calbiga ha Weste han Samar tungod han makusog nga panmimilitarisa han mga papet han mga kano. Usa naman nga lider-parag-uma nga gin-ngaranan nga hi Lilia Bucatcat an ginpatay hin mga gin-aalegar nga mga sundalo. Ha pagka-yana, gin-mimilitarisa gihapon an mga parag-uma ha Kagbana ha bungto han Burauen ha Leyte.

17796473_1330973350325673_6591255101936764704_n

Sobra dos mil nga mga parag-uma tikang ha kinse nga barangay han Calbiga an nagbakwit tungod han hugot nga militarisasyon ha ira lugar. (Ginkuha tikang ha Eastern Vista)

Ha bug-os nga nasud, sunod-sunod an panmatay ha mga parag-uma matapos bulkason han gobyerno han Pilipinas ngan NDFP an interim unilateral ceasefire tungod la gihapon ha pananabotahe han Estados Unidos ha iristorya pangkamurayawan. Naatubang hin hulga ha kinabuhi an mga parag-uma ha nasud tungod hit nagtitikagrabe nga militarisasyon ug apektado ini pati an ira panginabuhi.

Tuna han mga parag-uma, diri para ha base-militar han US

Lima ka bulan matapos lasurbuhon han superbagyo Yolanda an Sinirangan Bisayas, ginpirmahan ni hadto Defense Secretary Voltaire Gazmin ngan US Ambassador Philip Goldberg an EDCA kun diin may-ada hira mga ginkasarabutan nga lugar (agreed locations) nga pwede pag-basehan han US ha sulod han nasud.

Edca_Bases_Philippines_CNNPH

Agreed locations ilarum han Enhance Defense Cooperation Agreement

 

Diri pabor para ha mga parag-uma nga himuon nga base-militar an katunaan nga unta iginpanhatag ha ira sugad nala han unod han ira iginsusulong nga tinuod nga reporma ha tuna. Imbes na pagpulsan han mga imperyalista an karikuhan han nasud, angay lugod nga igdistribwer ini ha mga parag-uma para han kalugaringon nga pag-uswag han nasud. Lakip ha Genuine Agrarian Reform Bill, nga yana ginsusulong mismo ni Agrarian Reform Secretary Rafael “Ka Paeng” Mariano, an pagdistribwer han ngatanan nga public agricultural lands sugad han mga military reservations.

An imperyalista nga US an numero uno nga rason han kakurian ngan han kagutuman han mga parag-uma ngan han mga batakan nga sektor ha nasud Pilipinas. Ginsisiguro han US nga magpabilin an piyudalismo ha nasud agud masiguro an ira pan-ekonomiya nga gahum ug an pagpahaluag han ira teritoryo.

Ulang an Estados Unidos ha pag-solbar han maiha na nga giyera sibil ha nasud. Ulang an Estados Unidos ha pagpatuman han maiha na nga hingyap han mga parag-uma nga libre nga pagdistribwer han tuna. Ulang an Estados Unidos ha dayuday nga pagpakyas han monopolisasyon han tuna ha nasud.

US interbensyun, tipahan!

Iginpapanawagan han Samahan han Gudti nga Parag-uma ha Sinirangan Bisayas (SAGUPA – SB) an pagpaiwas han mga tropa han kano ha Ormoc ngan Guiuan ug ha bug-os nga nasud ngan an pagbasura han mga diri patas nga kasarabutan-militar nga Visiting Forces Agreement (VFA) ug Enhanced Defense Cooperation Agreement (EDCA). Diri ta angay tugutan nga tamas-tamasan han imperyalista nga US an soberanya han nasud Pilipinas.

Kasumpay han aton pagtipa han interbensyon han US ha nasud, aton man liwat iginsusulong an tinuod nga reporma ha tuna ug an nasudnon nga industriyalisasyon nga amo an magbabaton han problema pan-ekonomiya han nasud. Diri ta ini makakab-ot samtang kontrolado an mga burukrata kapitalista han nasud han mga hakug nga US.

BALIKATAN 2017 HA TAHUB HADR, TIPAHAN!

VFA-EDCA, IBASURA!

Reference:

Nestor Lebico

Secretary General, SAGUPA – SB

Advertisements