TACLOBAN CITY – Malinangpuson nga naipahayag han mga molopyo han General MacArthur, Eastern Samar an pagtipa ha dagko nga mga kompanya han mina ha ira lugar ha ginlansar nga Forum  ngan Martsa Rally ngadto han opisina han kompanya han mina han nakalabay nga December 5, 2011 nga gin-atenderan hin sobra 700 nga mga habal-habal drivers, trabahador ha mina, supplier, land owners, parag-uma ngan mismo han bug-os nga opisyales han nasabi nga bungto.

“Ginpapabay-an han aton gobyerno an kabutangan han katawhan ha  General MacArthur, Eastern Samar tungod nagpapadayon an pag-operate han dagko nga kompaya hin mina sugad nala han Masada Mining Corporation nga waray permit hin pagkuha hin tone-tonelada nga chromite ha Este han Samar,” pahayag ni Nestor Lebico, Secretary General han Samahan han Gudti nga Parag-uma ha Sinirangan Bisayas o SAGUPA-SB.

Pagmalatumat pa ni Lebico nga nagkaka-urusa an mga nagtambong han nasabi nga aktibidad ha pagpapa-ukoy han pagmimina labi na an mga dagko nga mga kompanya hin mina sugad nala han Masada Mining Corporation ngan King Resource Mining Corporation nga nagtatarget paghakot hin diri maubos hin 2,000 ka-tonelada kada bulan nga chromite.

Pagsaysay pa ni Lebico nga labot pa han kawaray permit naghahadi-hadi pa an mga dagko nga kompanya hin mina nga naabot ha punto nga ginpupudngan han ira mga armado nga guardya an mga gudti nga mga nag-mimina ha lugar, ginharangan an mga aragianan pakadto ha minahan, ginkokontrol an pan-presyuhan han chromite ngan an mga nareklamo nga mga trabahante, supplier ngan barangay opisyal in gintatarhog, ginpapa-blotter ngan may-ada na mga ginpankasuhan hin mga hinimo-himo nga kaso.

Kadugangan pa ni Lebico nga haros 60% han katawhan han  General MacArthur, Eastern Samar in naasa ha pakabuhi han tinatawag nga Camote Mining tungod na liwat han kawaray iba nga pagkakakitaan ngan diri kamaupay han pananom han mga produkto ha uma tungod kay napamatud-an na han mga eksperto nga acidic an tuna han Sur Este han Samar tungod hin ka-abunda ha natural nga mineral.

“Nananawagan an sektor han mga parag-uma ha rehiyon ha gobyerno ni P-Noy nga igpatuman an moratorium ha mina ha bug-os nga isla han Samar, igkansela ngan diri na mangarawat hin mga permit ha mina ngan tagan hin maupay ngan sustinable nga pakabuhi ngan mga batakan nga suporta sosyal  an  mga kablas nga parag-uma ngan katawhan,” pagtatapos ni Lebico.###

2 responses »

  1. Jack Xuzyxis says:

    In the latest GDP figures, the mining industry posted robust gains in nickel, chromite and natural gas.

  2. Suriing mabuti ang ipapakita nilang papel kung ang mga ito ay lehitimo at naaayon sa sinabi nilang aktibidad.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s