TACLOBAN CITY – Pangunguwat ha katawhan labi na ha mga parag-uma an ginsesering nga Peace and Development han 8th Infantry Division-Philippine Army (8ID-PA) tungod mas panhulga an ginbubuhat han mga sundalo ha mga parag-uma ha ira pangunguha hin picture, pag-interogar ngan paghatag hin ID ha mga pumasar ha ira screening ha panahon han ira Civil Military Operation (CMO) o an Psywar Team nga nag-uukoy ha mga barangay hin maiha nga panahon.

“Tinuod nga Psychological Warfare an ginhihimo han mga sundalo han 8ID-PA tungod diri ini nagbabaton han tinuod nga solusyon han kakurian han katawhan labi na an kawarayan kalugaringon tuna ha mga parag-uma nga mayoriya han aton populasyon” pahayag ni Nestor Lebico, Secretary General han Samahan han Gudti nga Parag-uma ha Sinirangan Bisayas o SAGUPA-SB.

Nag-agi hin maupay nga trining an mga pwersa han 8ID-PA ha ginsesering nga Psychological Warfare labi na ha pangunguna han 4th Special Forces Regiment ni Capt. Elmer Namocat nga nakabase ha Leyte ngan iba pa nga CMO batallion han 8ID-PA ha Samar labi na ha Las Navas han Norte Samar.

Pagmalatumat pa ni Lebico nga pirit nga ginhahamisan han 8ID-PA an pasista hini nga nawong labi na ha media pero ha kamatuoran ginkokontrol an mga gios han parag-uma, nagpipinanguyab labi na ha may asawa, pag-rape ha kababayen-an, nangunguro ha salog, pirit nga pagpapirma nga diri na umapi ha mga progresibo nga grupo, paghimo nga giya ha mga parag-uma ha ira mga operasyon ngan paghuhulga ha kinabuhi labi na an mga lider parag-uma.

Pagsaysay pa ni Lebico nga labot han pakitang-tao nga postura nga ginhihimo han mga militar, ginsasapawan ngan ginpapapelan pa hini an mga trabaho mismo han mga ahensya han gobyerno ngan labi an mga Local Government Unit (LGU)  nga baga-baga hin mga inutil an aada hini ha mga bungto ngan baryo.

“Militarisasyon ini ha sibilyan nga otridad, mas nagpapagrabe pa lugod ini han kakurian han katawhan ha aton rehiyon”, pagtatapos ni Lebico.###

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s