TACLOBAN CITY – Batakan nga mga problema han katawhan kinahanglan kaupod ha pagsurbey para makita an tinuod nga pagserbisyo han aton mga opisyal han gobyerno labi na an aton presidente, magseseguro ini nga diri pakitang tao an ginhihimo ngan aada ha tinuod nga dalan an pagsolbar han kakurian ngan kakablasan han katawhan Pilipino.

Ha pinakabag-o pala nga surbey nga ginpagawas han SWS han May 3, 2011 ha rating ni P-Noy umubos ini hin 18% tikang ha +64% han nakalabay nga Setyembre-Nobyembre 2010 ngadto ha +46% yana nga Marso 2011, pero hini nga paghamubo diri ini upod ha mga pakiana ha pag-surbey an kabahin han pagsolbar han problema ha monopolyo ha tuna ha bug-os nga nasud.

“Kun diri gin-uupod an mga batakan nga problema han katawhan ha pag-surbey han rating ha aton mga opisyal han gobyerno labi na an aton presidente, magpapadayon an mapan-uwat nga mga programa han aton gobyerno ngan matatahuban an tinuod nga rating han katawhan ha aton mga namumuno han aton gobyerno,” pahayag ni Nestor Lebico, Secretary General han Samahan han Gudti nga Parag-uma ha Sinirangan Bisayas o SAGUPA-SB.

Pagmalatumat pa ni Lebico, basar han SWS duha (2) han pinakaubos nga rating han aton presidente amo an isyu han pagsolbar han kagutom nga aada la +5 ngan pagsolbar han implasyon o paghinitaas han mga batakan nga mga papliton nga aada zero (0).

Pagklaro pa ni Lebico nga ha kinse (15) nga mga isyu nga upod ha pakiana ha surbey han SWS, an pagbulig kuno ha mga pobre an pinakahataas nga aada ha +47, pero tungod pa ini han mapan-uwat nga programa han Pantawid Pamilyang Pilipino Program o 4P’s nga ginhahambog ni P-Noy nga asya an solusyon han kakurian han katawhan Pilipino.

“Tinuod nga reporma ha tuna an yawe nga solusyon han kakurian han katawhan Pilipino nga mayorya nga ginkokomponer han mga parag-uma ha kabaryuhan, kun diri upod ini ha programa ni P-Noy mas karuyag namon nga (negative) -46% an grado niya,” pagsaysay pa ni Lebico.

Mahanunumdoman nga gindepensahan han Palasyo an nagtitikaubos nga rating han aton presidente tungod pa kuno kay asya ini an normal nga natatabo ha usa nga presidente bisan ha naglabay, waray pa maklaro lugod nga diri natutuman an mga saad han mga naglabay nga namumuno han aton gobyerno sugad kan Presidente Aquino yana.###

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s