TACLOBAN CITY – Naninindugan an ANAKPAWIS Party-list Eastern Visayas Chapter (ANAKPAWIS-EV) nga kinahanglan ha pinakamadagmit nga panahon mabasura na an Oil Deregulation Law o Republic Act 8479 ngan an pagsertipika nga urgent para himuon na nga balaud an House Bill 4317 o pag-repeal han Oil Deregulation Law.

Yana pala nga adlaw naghataas hin P1.25 kada litro an presyo han gasolina han mga dagko nga kompanya han lana ha aton nasud ha luyo ini han paghamubo ha world market han krudo tungod han pagkamatay ni Osama Bin Laden ha Pakistan.

“Ha sobra na usa kadekada nga nag-eksister an Oil Deregulation Law nga balaud, bilyon-bilyon na an nahimo nga super tubo han mga kartel ha lana sugad han Petron, Shell ngan Chevron. Bilyon-bilyon liwat kada tuig an nawawara nga salapi han katawhan Pilipino tungod han waray wantas nga paghinataas han mga batakan nga papliton nga epekto han diri makontrol nga presyo han lana,” pahayag ni Frank Falguera, Secretary General han ANAKPAWIS Party-list Eastern Visayas Chapter.

Pagmalatumat pa ni Falguera nga dida han tuig 2008, usa ka dekada tikang mahimo nga balaud an Oil Deregulation Law han 1998, umabot hin P268.8 billion an kita han Petron Corp. kumo numero uno nga korporasyon ha bug-os nga Pilipinas nga ha kada tuig sobra 20% nga nahataas pa an kita hini.

Dugang pa ni Falguera nga yana nga panahon tungod han katorse (14) na kabeses nga pag-umento han lana yana pala nga timprano han tuig 2011, dagmit nga nagsirit liwat an mga batakan nga papliton sugad han tinapay, gas, utanon, bugas, delata ngan damo pa nga iba nga nagpapagrabe pa han mas nalulubong nga kakurian ngan kagutom han katawhan ha bug-os nga rehiyon-8.

Pagsayod pa ni Falguera nga waray pulos ha katawhan an ginhihimo nga subsidyo han gobyerno ha mga driver ngan iba pa nga sektor tungod kay inutil ini ha padayon nga paghinataas han presyo han lana, natabunan na an pira ka pesos nga iginhatag ha mga driver hadi pa nga paghataas han diesel ngan gasolina.

“Ha sobra P8.00 pesos nga pag-umento han presyo han gasolina tikang han Enero yana nga tuig, napapanahon na nga abrehan an libro han mga kartel ha lana para makita an sobra-sobra nga pag-presyo, kuhaon ha mga kartel an P10.5 billion nga ginhatag nga insentibo ngan tax credits ngan panhimulusan ini han katawhan Pilipino, tanggalon an 12% Value Added Tax (VAT) ha lana ngan an pagnanasyunalisa na han industriya han lana ha aton nasud,” pagtatapos ni Falguera.###

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s