TACLOBAN CITY – Pinaka syahan nga apektado an surok han tubig han 50 nga pamilya han mga parag-uma ha Sitio Calunasan han Brgy. Banat-e, San Isidro, Leyte, dida pa han Agosto 2010 han magtikang an drilling han NorAsian Energy Ltd., usa nga unit han Otto Energy Ltd. nga amo an nakakuha han exploration permit para han pagmina hin lana ha Leyte.

Nagkaada hin lagay o lapok an surok han tubig nga gin-iinom han mga taga Brgy. Banat-e, San Isidro tungod kay ubos la han lugar han drilling site amo man liwat an creek nga surok han tubig para han barangay.

“Makaaalarma kaupay ini nga panhitabo ha San Isidro, Leyte tungod hini nga pagmimina hin lana ha lugar, labi na nga baga nasasarop an baba han aton lokal nga gobyerno ngan mismo an aton probinsya hini nga pagmimina nga taliwas han mga pahayag nira ha pira pala kabulan an naglabay kontra pagmimina ha Leyte,” pahayag ni Nestor Lebico, Secretary General han Samahan han Gudti nga Parag-uma ha Sinirangan Bisayas o SAGUPA-SB.

Pagmalatumat pa ni Lebico nga  nahahadlok na ngani an mga tawo han hagrani nga mga kumunidad han drilling site tungod kay bangin ha panahon nga mag-full operation na an mining in mapaiwas hira ha lugar labi na nga an pinakalab-as pala nga panhitabo an pagkamatay han 13 nga molopyo ha Compostila Valley ha Mindanao tungod  han matabunan hira han lapok tikang han ginmiminahan nga lugar.

Dugang pa ni Lebico nga naglalangkob hin maabot 32,000 ka ektarya an target pagminahan ha San Isidro ngan ginkukunukuno nga maabot ha 18 milyon ka bareles hin lana an makukuha ha nasabi nga lugar.

“Bisan paman pira ka milyon an kuno gagastuhon han kompanya han mina ha nasabi nga lugar, diri bisan san-o paman masusuklian an mahihimo nga distroso han aton mga molopyo ha lugar ngan labi na an epekto hini ha aton kalibungan nga ha aton kahibaruan dako nga epekto hini kutob ha kadagatan,” pagsayod pa ni Lebico.

Kun mahanunumduman nagtikang an eksplorasyon han pagmina han lana ha San Isidro tumikang pa han 1960’s nga ginkontrata han Philippine Oil Development Company o PODCO an blasting para han nasabi nga eksplorasyon ngan yana ginpapadayon ini han Otto Energy Ltd. nga waray man la pagsuson han aton mga lokal nga gobyerno.###

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s