TACLOBAN CITY – Tikang han sumulod an aton gobyerno han World Trade Organization o WTO han dekada nobenta, dida man liwat tumikang an pagtikagudti han produksyon han aton bugas nga numero una nga pagkaon han katawhan Pilipino.

Tungod ini han haluagan nga kumbersyon han aton agrikultural nga katunaan nga nangunguna nga nagduduso han krisis ha bugas para tagan lugway an interes han mga dagko nga langyaw nga kapitalista nga nagtatag-iya han mga hacienda han saging, pinya, tubo, tuba-tuba ngan damo pa nga iba nga kinahanglan han ira mga industriya.

“Ha kamatuoran maiha na an krisis ha pagkaon han katawhan Pilipino, ngani mas nagtitikagrabe an kagutom ngan kakurian an gin-aantos yana han kadam-an, waray pulos an ginsesering han mga opisyal han gobyerno nga supesyente an supply han bugas samtang kami mismo nga mga parag-uma nga nagtatanom han humay in mismo NFA pa nga bugas an pagkaon,” pahayag ni Nestor Lebico, Secretary General han Samahan han Gudti nga Parag-uma ha Sinirangan Bisayas o SAGUPA-SB.

Dugang pa ni Lebico nga tikang han 1991 kutob 2002 nakada na ha 86,606 ka ektarya hin tuna nga gintatamnan hin humay an ginkumbert subay han Census of Agriculture, waray pa ini an mga nakumbert pa tikang han 2002 ngada yana nga 2011 nga mas haluagan pa labi han mahimo nga balaud an Tourism Act of 2009 nga legal nga nagkukumbert han agrikultural nga katunaan ngadto ha paggamit ha eko-torismo.

Pagsaysay pa ni Lebico nga dako nga ehemplo ha aton rehiyon an pagkumbert han agrikultural nga katunaan ngadto han pananom han Tuba-Tuba labi na ha probinsya han Biliran nga asya an gindidikta han mga langyaw nga kapitalista para han panginahanglan han bio-fuel ha ira nasud, ngani yukot-yukot na ka ektarya an target han mga probinsya ha bug-os nga rehiyon-8 para han Tuba-Tuba plantation.

“Halarom an ugat han krisis ha bugas nga nagdadabi hin pulitikal nga desisyon para igpabilin an seguridad ha pagkaon han katawhan Pilipino ngan labi na an pan-ekonomiya nga agresyon han mga langyaw nga kapitalista ha aton nasud nga nangunguna han hagluag nga kumbersyon han aton agrikultural nga katunaan,” pagtatapos ni Lebico.###

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s