TACLOBAN – Para maabat an tinuod nga pag-uswag han pinakadamo nga ihap han aton populasyon, an mga kablas nga parag-uma, kinahanglan dagmit nga himuon han rehimen Aquino an pagsabalaud han Genuine Agrarian Reform Bill (GARB) o HB 374 yana nga tuig 2011.

Diri la pagwara han waray wantas nga kurapsyon han aton burukrasya an solusyon han pag-uswag han Pilipinas, nga asya an gintatagan hin duon ni Pres. Aquino, kundi mas kinahanglan pa nga tagan hin mayor nga panginano an pagwara han kontrol han mga Asyendero kakunsabo an mga langyaw nga kapitalista nga nagtag-iya hin hagluag nga katunaan ha kaumhan.

“75% han aton populasyon nga mga parag-uma  an nagkukuri nga amo an imo BOSS Pres. Aquino, kun sensiro an aton presidente nga buligan ini nga iya BOSS, igpapatuman niya an tinuod nga reporma ha tuna ha pangunguna mismo han pagdistrebwer han ira katunaan ha Hacienda Luisita,” pahayag ni Nestor Lebico, Secretary General han SAGUP-SB.

Dugang pa ni Lebico nga ha aton rehiyon nagpapabilin nga 7 ha 10 nga parag-uma in waray pananag-iya hin tuna ngan Milyon-Milyon ka pesos an nawawara nga kita han mga parag-uma ha kada kat-ani labi ha humay ha rehiyon-8 tungod han plete ha tuna, ngani ginpapakita han datos han Department of Agrarian Reform-8 (DAR-8) nga aada la ha 177 ka ektarya an nadistrebwer nga tuna ha mga parag-uma han nakalabay nga 2010 kumpara han ira target nga 13,080 ektarya o waray ini umabot hin usa ka porsyento, ngan hini nga pagdistrebwer in waray kalabti naliwat an mga dagko nga agaron maytuna ha aton rehiyon.

Pagmalatumat pa ni Lebico nga diri san-o man makakab-ot an tinatawag nga kusog han katawhan nga magdesisyon para ha pag-amot han pag-ursa han sosyedad kun magpapadayon an pyudal nga paniniyupi ha mga parag-uma han mga dagko nga agaron maytuna labi kay asya liwat ini an mayorya nga nagkokontrol han aton sistema han gobyerno.

Mahanunumduman nga pira na nga presidente an naglabay pero waray la gihapon masosolbar an problema ha tuna ngan ha yana nga bag-o nga rehimen waray nakikita nga senyales ug interes nga tagan hin kasolbaran ini, lugod ginpapadayon ha pag-implementar an proybado na nga buwa nga reporma ha tuna han gobyerno nga asya pa ngani an nahimo nga behikulo ha pangangagaw han katunaan ha mga parag-uma sugad nala ha Leyte Saba Basin Area (LSBDA) ha pangunguna ni Atty. Cheng Veloso.###

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s