TACLOBAN CITY – Damo na nga dekada an naglabay hasta ngada yana diri ginkukonsidera han gobyerno nga an kawaray tinuod nga reporma ha tuna dako an papel han kawaray seguridad ha pagkaon ngan mauswag nga produksyon han agrikultura ha aton nasud.

 

Diri nakikita ni Pres. Aquino nga maiha na nga ginpapakigbisog han katawhan Pilipino an pagkaada kalugaringon tuna nga asya an nagin yawe nga papel han mauswag nga produksyon han agrikultura ha Vietnam, ha luyo ini han iya paghambog nga dako kuno an maibubulig han mauswag nga agrikultura ha Vietnam ha aton kalugaringon agrikultura ha iya pagbisita yana nga adlaw ha nasabi nga nasud ngan pag-atender han ika-17 nga summit han Association of Southeast Asian Nations (ASEAN).

 

Pagmalatumat pa ni Nestor Lebico, Secretary General han Samahan han Gudti nga Parag-uma ha Sinirangan Bisayas o SAGUPA-SB, nga waray magiging pulos an mga lakat ni Pres. Aquino ha iya kunohay intensyon nga pauswagon an aton ekonomiya kun diri niya tatagan duon an prinsipal nga problema han katawhan Pilipino nga amo an reporma ha agraryo kumo butagtok han pag-uswag han aton nasyon.

 

Dugang pa ni Lebico, nga mahihimo na liwat ini nga pamasyada han aton presidente ngan ibandelyo an pagkuha han aton mga karikuhan ha mga kapitalista para han ira super tubo ngan paniniyupi ha katawhan Pilipino ngan an pinakamapait kun maghahatag pa lugod hin lugway para han mas haluagan nga pangangagaw hin tuna ini nga ginhuhugna nga buligay han duha nga nasud sugad han nahitabo han naglabay nga rehimen.

 

Mahanunomdoman nga ha 100 ka adlaw ni Pres. Aquino kumo presidente han aton nasud in waray nakita nga programa ngan palisiya para ipatuman an tinuod nga reporma ha tuna ngan sugad nagpapadayon an monopolyo han hagluag nga katunaan han mga dagko nga agaron maytuna sugad nala ha Hacienda Luisita ngan ha Leyte Saba Basin Area ha aton nga dapit.###

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s