TACLOBAN CITY – Kabaliktaran han ginyakan ni Pres. Aquino nga kuno Mayroon na po kayong gobyernong hindi kayo binabalewala o inaapi ” an inaabat han sektor han mga parag-uma sanglit natuo an mga parag-uma nga nagpapakabuta-bungol an aton presidente ha maiha na nga hingyap han mga parag-uma nga magkaada kalugaringon tuna ngan talwas han grabe nga pag-abuso militar ha kabaryuhan sugad nala han nahinanabo mismo ha Hacienda Luisita.

 

“Diri namon maintendihan an pahayag ni P-Noy ha iya syen (100) ka adlaw kumo presidente, ambot kun indirekta niya nga karuyag sidngon nga an kawarayan tuna ha mga parag-uma ngan militarisasyon ha kabaryuhan an iya palisiya ha iya administrasyon labi na mismo kay waray niya mahesgoti an amon sektor,” pahayag ni Nestor Lebico, Secretary-General han SAGUPA-SB.

 

Pagmalatumat pa ni Lebico nga kun magpapadayon an kawaray tuna han kadam-an han aton populasyon nga ginkukumponer han sektor han parag-uma, magpapadayon an kagutom ngan kakablasan han katawhan Pilipino ngan an iya ginhahambog nga pag-uswag han aton ekonomiya in magpapabilin nga diri aabaton han katawhan sugad han naglabay nga mga rehimen.

 

Nagpapabilin nga pito (7) ha napulo (10) nga parag-uma ha aton rehiyon in waray kalugaringon tuna nga gin-uumhan kun sugad nagpapasaop kun diri man nagpapasuhol han iya kusog pagtrabaho ha uma an kaurugan han aton populasyon.

 

Pagsaysay pa ni Lebico nga ha naglabay pala nga semana ginbuksas han mga parag-uma nga nagtitikang ha Weste ngan Norte han Samar an grabe nga pagbayolar han tawhanon nga katungod han mga parag-uma sugad nala han pangangastigo, pangawat, iligal nga pag-aresto, iligal nga pagrikisa, interogasyon, paghulga ha kinabuhi ngan pagruba han mga pananom labi an humay.

 

“Imbes tuna ngan tinuod nga suporta ngan sosyal nga serbisyo an ighatag han aton gobyerno, gintatagan lugod kami hin kadugangan nga problema han grabe nga militarisasyon nga nagruruba han amon mga pananom ngan nagtatamak han amon mga tawhanon nga katungod nga mabuhi ngan umukoy hin mamingaw ngan talwas nga sosyedad,” kadugangan pa ni Lebico.

 

Mahinunumdoman nga ha naglabay nga Oktubree 7, 2010 in gindumara an ika-100 ka adlaw han paglingkod ni Pres. Aquino kumo namumuno han aton nasud nga magpapakita kunta han kabug-osan niya nga palisiya ngan programa para salbaron an kabutangan han aton ekonomiya ngan katawhan Pilipino.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s