Una, natuod kami nga kinahanglan ugupan an rinaugdaug nga katawhan Pilipino labi na an mga kablas nga mga Parag-uma. Ha maiha nga panahon waray mahatagi hin Katungod Pantawo ini nga sektor labi an Socio-Eco nga kabutang, ginraraugdaug ngan ginhuhuthutan han ira talento ngan kusog han mga naghahadi nga klase labi an mga Agaron Maytuna.

Ikaduha, nagpapahayag kami han mga pagtalapas han Ahente han aton gobyerno sugad han Pulis ngan Militar kay hira man gud an una nga magpapatuman kunta han maupay nga gawi, ngan amon liwat ini ginpapahayag kun mayda kami kinakaptan nga Affidavit han Reklamo han Pamilya ug Biktima ngan klaro nga mga Sibilyan an biktima han panalapas ngan diri mga NPA sugad han ginpapagawas han mga Pulis/Militar. Tungod hini ginbubuligan ngani namon an aton gobyerno nga ipatuman an Comprehensive Agreement on Human Rights and International Humanitarian Law (CAHRIHL).

Ika-tulo, waray kami labot han agway han Militar/Pulis ngan NPA nga an Gobyerno an Prinsipal nga magsosolbar hini nga diri gintatagan hin seryuso nga pitad asya nga ha maiha nga panahon nagpapadayon ini nga agway. Ngani nananawagan kami han gobyerno han dagmit nga Peace Talks ha duha nga panig para mapugngan ug masolusyunan ini nga agway sugad han ambush ug iba pa nga gindudurot han pagkamamatay han mga membro han duha nga panig, Pulis/Militar pati an NPA. Sugad man ginkukundinar namon an pitad han gobyerno nga sabotahion an Peace Talks para ini diri madayon labi na kay aada na ha lebel han Socio-Economic Reform Agenda an gintatalakay kunta han duha nga panig.

Ika-upat, ngani an anti-insurhensiya nga Oplan Bantay Laya (OBL) han gobyerno in klaro nga nagbabayular han katawhan Pilipino kay mismo an sibilyan an target hini labi na adton mga progresibo nga grupo nga nagdedemanda han maupay nga Serbisyo Sosyal sugad nala han Tinuod nga Reporma ha Tuna han gobyerno (klaro ini ha ira mga propaganda labi adton ginpagawas nga “Knowing the Enemy”). Ha aton rehiyon in klaro nga pinan-matay an mga lider han progresibo nga grupo labi han panahon ni Gen. Palparan nga hira Atty Dacut, Pastor Lapuz, Atty. Bokar, Fr. Luceru, Dr. Ruseulo, Pax Diaz, Professor Cui, Dominador De Luna ngan damo pa nga iba. Ginkundinar namon ini nga panmatay kay tungod mga sibilyan ini nga dapat ginpapanalipdan ngani kunta han gobyerno.

One response »

  1. KAPAWA says:

    pakipost naman sana ninyo ito as one of your articles. urgent lang po. salamat.

    MGA KASO HAN PANANALAPAS HA KATUNGOD PANTAWO
    HA JIABONG NGAN MOTIONG HA SETYEMBRE, 2010

    Gin-bugos han KAPAWA (Kapunungan han Gudti nga Parag-uma ha Weste han Samar)
    Oktubre 3, 2010

    Nagpapadayon an abuso militar ngan pananalapas ha mga katungod pantawo han mga sibilyan dinhi ha Western Samar. Ha sakob la han usa ka semana ng operasyon militar ha mga baryo ha kairayahan han mga bongto han Motiong ngan Jiabong, nahitabo an masunod nga mga abuso han mga tropa han 34th Infantry Batallion han Philippine Army:
    Ha Brgy. Casapa, Jiabong, usa nga nanay ngan an iya mga menor de edad nga anak an biktima han pagpasuol ngan panarhug han mga sundalo. Samtang ha Brgy. Bunga, Motiong, nairekord an pangutang, pangawat ngan distroso ha pananom ha tulo nga pamilya nga parag-uma.
    Ha Brgy. Casapa, Jiabong, walo ga sundalo an kinada ha balay ira Rosalie Gagbo, 30 anyos, asawa ni Brgy. Kgwd. Nilo Gagbo, 41 anyos, hadton aga han Setyembre 20. Ha atubangan han iya tulo nga bata, gin-imbestiga han mga sundalo hi Rosalie hiunong ha mga NPA nga nakada kuno ha ira lugar. Tungod han kahadlok, diri makabaton hin maupay hi Rosalie. Gin-balbag hiya hin kahoy ha iya liog, ngan nagtikang an panangis han kabataan nga mayda edad 4, 2, ngan usa pa la katuig. Dinugang an kahadlok ni rosalie ngan kabataan ha ura-ura nga panarhug han mga sundalo— gintutukan hira hin pusil nga armalite ngan gin-kablit ini pero waray bumuto. Pinangawat pa han mga sundalo an ira duha nga manok ngan usa nga sundang katima, ginpirit hi Rosalie nga pumirma ha usa nga kasuratan nga waray hiya kastigoha han mga sundalo. Tubtub gab-I an panangis han kabataan tungod han grabe nga kahadlok. Pakalabay hin usa kasemana, binalik an mga sundalo ha Brgy. Casapa. Ginbiling nira an usa pa nga anak nira Rosalie ngan Nilo nga may edad 7 anyos, ngan ginpirit nga pumirma koo testigo nga waray pagkastigoha an iya nanay ngan kabugtuhan.
    Tubtub yana, diri pa natatagan hin hustisya an damo nga kaso hin pangawat, pangastigo, panarhug ngan iba pa pananalapas ha katungod pantawo nga binuhatan han SOT han mga sundalo nga nag-okoy ha Brgy. Casapa ngan Bunga, hadton panahon I Paparan, bisan an kaso hin panmatay kay Freddie Babatio nga usa la nga ordinnaryo nga parag-uma. Sanglit, mayda na liwat hin bag-o nga mga kaso hin pangabuso labi na ha kababayen-an ngan kabataan nga nakakaringggal ha mga sibilya.
    Setyembre 20 han sinulod an sobra 20 elemento han 34th IB PA ha Brgy. Bunga. Ha sakob han usa kasemana, nagkakalakat pagkakaaga an mga sundalo ngan pagkakulop, nagkakabalik hira ngada ha baryo. Samtang nagbibinalik-balik an mga sundalo, sige an ira pangutang ha tindahan han mag-asawa nga Irene ngan Serafin Pacios, Jr. Inabot hin harani ha P4000 an pinangutang han mga sundalo nga bugas, sopdrink, biskwit, sardinas ngan bisyo nga sigarilyo ngan irimnon nga Colt 45. Kahuman han ira operasyon, bugas la an ginbayaran han mga sundalo, samtang an ira pa baraydan naabot pa hin P2200. Gin-aroan ni Pacios hin ID an sundalo nga nangotang pero waray man ini paghatag, sanglit nagpakilala la ii ha ngaran nga “Jake.” Duda iwat a tag-iya han tindahan ha sugad la nga ngaran kaya naghatag iwat an sundalo hin ngarann nga “John Oblino.” An siring pa han sundalo, aada na nira iimpase hiton utang ha ira pagbalik, pero waray man klaro nga ginsering kung san-o hira mabalik.
    An ikinababaraka pa nira Pacios, tungod kay waray mga nameplate an mga sundalo, waray magpakilala kunng ano an ira tropa, hin-o a ira opisyal o commanding officer ngan kunng diin hira nadadestino nga detatsment, nga subay ha mga balaud, kinahanglan kunta nga himoon han mga sundalo ha ira mga operasyon. Nahitabo na ha Brgy. Bunga han una pa nga mga operasyon militar nga nag-iiha an mga sundalo ha baryo. Nababaraka an mga sibilyan tungod kay an ira gin-utangan ng may tindahan nga hi Wenceslao Jomagdao, hasta ngada yana waray pa pagbayadi han mga sundalo.
    Han bagan diri pa sadang an pangutang, ipinagawat pa han mga sundalo an ipinarabo o ibaraligya nga dagko nga kapayas ngan tubo nira Arcenia ngan Jose Labong, didto liwat ha Brgy. Bunga. Nahibang pa ira anihon nga humay kay gintarap-tarap han mga nagpaka-combat nga mga sundalo. Ginkawat liwat han mga sundalo an usa kasako nga bilanghoy nga ig-baraligya nira Gabriel ngan Remedios Pacleta. Kaupod pa nga kinawat han sundalo an usa nira nga manok.
    Nahihitabo yana an haluagan nga nagtitikapintas nga operasyon militar ha Western Samar, diri la ha Motiong ngan Jiabong. Subay ha impormasyon tikang ha mga lider parag-uma ha iba-iba nga bongto, mayda liwat hin mga operasyon militar ha kabaryuhan han Catbalogan, San Jorge, Matuguinao, Gandara, ngan ha Paranas ngan San Josede Buan, naabot hin usa kabulan an pamamasismo han militar ha kairayahan. Gin-aaro han malupyo han Western Samar nga ig-udong an militarisasyon ha kabaryuhan tungod han dagko nga apekto ngan distroso hini ha ira pangnabuhi komo mga parag-uma.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s