TACLOBAN CITY – Genuine Agrarian Reform Bill (GARB) o HB 374 an nakikita nga solusyon han kawaray Tinuod nga Reporma ha Tuna ha pagselibrar han ika-21 ka tuig nga pag-eksister han SAGUPA-SB yana nga maabot nga August 24, 2010.

Buwa nga reporma ha tuna an nakita han mga parag-uma ha maiha na nga pag-eksister han CARP ug CARPer ngan usa hini nga ehemplo an mapan-uwat nga Stock Distribution Option (SDO) ha Hacienda Luisita.

“Ha amon pagselibrar han ika-21 nga anibersaryo han amon organisasyon ginpapatapod namon an waray kaguol nga pakigbisog para han amon lihitimo nga katungod nga magka-ada libre ngan kalugaringon tuna nga pag-uumhan an mga parag-uma ha aton rehiyon” pahayag ni Nestor Lebico, Secretary General han Samahan han Gudti nga Parag-uma ha Sinirangan Bisayas (SAGUPA-SB).

Nagpapabilin nga pito (7) ha napulo (10) nga mga parag-uma in waray pananag-iya hin tuna ha aton rehiyon. Nakakonsentra ini ha mga dagko nga agaron maytuna sugad nala han mga Veloso, Larazabal, Boromeo, Mortigue, Sarmiento ngan iba pa ha Leyte nga nagtatag-iya han hagluag nga mga Hacienda nga nagkokontrol han mga saop hini.

Pagmalatumat pa ni Lebico nga dako nga tunok ha amon kinabuhi an makukuha kun magkakaada tuna an mga parag-uma kay an pagiging saop in mas na-umento pa lugod an kanan parag-uma mga utang kay tungod haros 22% han kita ha pag-uma in nahihingadto man la ha plete ha tuna dugang pa han diri patas nga bahinay.

“Tungod han amon grabe nga gin-aabat nga kagutom ngan kakablasan diri na manggud kami makakapalit hin kalugaringon tuna sanglit mas ginduduso namon an paghihimo han balaud nga GARB” dugang pa ni Lebico.

Mahanunumduman nga komo importante nga duon ha sosyal nga hustisya, ha GARB la makikit-an an pagpapatuman han tinuod nga reporma ha tuna labi kay waray bayad bisan singko sentimos an panhatag han tuna ngan waray na mga luho nga nagpapalusot sugad nala han SDO kumpara han CARPer.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s