TACLOBAN CITY – Pira pala ka-adlaw yana nga semana an naglabay, ginpahayag han mga parag-uma ha bungto han Matuginao ngan San Jose De Buan ha Weste han Samar an mapait nira nga kaagi ha kamot han mga Militar nga nagbayular han ira katungod pantawo labi na an pangangastigo ngan pagpupugong ha pan-ekonomiya nga aktibidad nga duroy nagpapagrabe han daan na nga inaabat nga kagutom ngan kakablasan han mga parag-uma.

“Bisan paman magbinuwa an militar ha yakan, an aksyon hini nga ginbubuhat yana nga panahon labi na ha kabaryuhan in diri bisan san-o matatago sugad nala han nakalabay nga panahon han Martial Law nga damo an pinatay nga parag-uma” pahayag ni Jose Tico, Tagapagyakan han SAGUPA-SB.

Labot la han direkta nga pagbayolar han tawhanon nga katungod han sibilyan dako nga mai-kokonsidera an in-direkta nga pagtamak han katungod han katawhan an diri masolbar-solbar han gobyerno nga kagutom ngan kakablasan gawas pa han nagtitikgrabe nga pangangagaw han tuna ha mga parag-uma ha aton rehiyon.

Pinakalab-as nga nahitabo an pag-gaposa ngan pagkastigo kan Bertino Maistre, 60 anyos an pangidaron nga taga Sitio Salvacion, Brgy. San Nicolas, San Jose De Buan, Samar ngan mismo gin-upod-upod hiya han kalakat han mga militar hin 2 ka-adlaw ha guba kaupod an iya 6 anyos nga anak. Ginpa-blotter mismo ini han biktima nga panhitabo ha Pulisya ngan nagpa-medikal chek-up ha Heath Center han bungto.

“Nasugot man kami han mga patawag ngan pentakasi nga ginhihimo han mga sundalo pero diri nagad kami kinahanglan nga ig-inopod-opod pa hini nga ira mga operasyon ngan labi na gud ini nga  grabe nga pangangastigo ngan pananarhug ha amon, mismo ha atubangan han kadam-an ngan amon mga anak” pahayag han biktima nga hi mano Bertino Maistre.

Ini nga mga bag-o nga panhitabo han panalapas han katungod han katawhan in nagpapamatuod la han maiha na nga larang han militar nga kaupod nira nga target han ira mga operasyon an sibilyan labi na an aada ha mga progresibo nga grupo nga natipa han mapaniyupion nga sistema han aton katilingban labi na ha yana nga panahon han eleksyon.

“Mas napapanahon nga kinahanglan atuhan ngan ibuksas ini nga mga panhitabo kay mas mapait pa ini han grabe nga pagpakaraot han mga organisasyon han mga parag-uma nga nag-uungara han tinuod nga pagbabag-o, kahimyangan, hustisya ngan tinuod nga reporma ha tuna” dugang pa ni Tico.

Mahinunumdoman nga pira nga mga parag-uma an dumangop ha Radyo yana nga semana ha syudad han Tacloban para ipahayag an kadismaya han nagtitikagrabe nga krisis nga ginpapagrabe pa han militarisasyon ha kabaryuhan labi na ha Samar nga parte han aton rehiyon.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s